الماتى قالاسى تجد مەملەكەتتىك ءورت باقىلاۋ باسقارماسىنىڭ باسشىسى دانيار ءجۇسىپوۆ جىلىتۋ ماۋسىمىندا ءورت ءقاۋىپتى جاعدايلاردىڭ الدىن الۋ بويىنشا قانداي جۇمىستار جۇرگىزىلىپ جاتقاندىعى تۋرالى ايتتى، دەپ حابارلايدى Almaty-akshamy.kz.
«2023-2024 جىلدارداعى جىلۋ بەرۋ كەزەڭىندە ءورتتى ازايتۋ جانە ادام ولىمىنە جول بەرمەۋ بويىنشا پارمەندى شارالار قابىلداۋ ءۇشىن دەپارتامەنت وسى باعىتتا اۋقىمدى پروفيلاكتيكالىق جۇمىستار جۇرگىزۋدە. دەپارتامەنت 153 068 جەكە تۇرعىن ءۇي ەسەپكە الىندى، ونىڭ 2 527ء-سى قاتتى وتىنمەن جىلىتىلادى. حالىقتىڭ الەۋمەتتىك وسال توپتارىنا جاتاتىن 903 وتباسى انىقتالدى»، - دەدى د.ءجۇسىپوۆ.
جىل باسىنان بەرى الماتى قالاسىنىڭ اۋماعىندا بارلىعى 496 ءورت تىركەلدى (2022 جىلى – 578). ورتتەردىڭ ەڭ كوپ سانى تۇرعىن ءۇي سەكتورىنا تيەسىلى - 242 جاعداي نەمەسە 48%.
بۇعان دەيىن دە حابارلانعانداي، ءورتتىڭ نەگىزگى سەبەپتەرى: ەلەكتر سىمدارى مەن ەلەكتر جابدىقتارىنىڭ قىسقا تۇيىقتالۋى، پەشتەردىڭ دۇرىس جۇمىس ىستەمەۋى جانە ءورتتى ابايسىز پايدالانۋ.
دانيار ءجۇسىپوۆ مەگاپوليس اۋماعىندا بولعان سوڭعى ورتتەردىڭ مىسالدارىن كەلتىردى. مىسالى، 31 قازان كۇنى الاتاۋ اۋدانىندا جەكە ۇيلەردىڭ ءبىرىنىڭ اۋماعىنداعى «ۆرەميانكانىڭ» سىرتىن قاپتاعان پەنوپلەكس ورتەندى. كەيىنىرەك بەلگىلى بولعانداي، ءورتتىڭ شىعۋىنا بالالاردىڭ شالالىعى سەبەپ بولدى.
ورتتەر مەن قايعىلى وقيعالاردى بولدىرماۋ ءۇشىن ءورت سوندىرۋشىلەر «كومەك قولى» اكسياسىن وتكىزەدى، ونىڭ اياسىندا حالىقتىڭ الەۋمەتتىك وسال توپتارىنىڭ 13 وتباسىنا اتاۋلى كومەك كورسەتىلدى. ءورت سوندىرۋشىلەر مەن جەرگىلىكتى اتقارۋشى ورگانداردىڭ وكىلدەرى پەشتەردىڭ مۇرجالارىن تازارتۋعا، جارىقتاردى جابۋعا، ءتۇتىن ارنالارى وتەتىن جەرلەردە قابىرعالاردى اكتەۋگە كومەكتەسەدى.
سونىمەن قاتار، سپيكەردىڭ مالىمەتىنشە، 2018 جىلدان باستاپ قازىرگى ۋاقىتقا دەيىن الماتىلىقتاردىڭ تۇرعىن ۇيلەرىندە كومىرتەگى توتىعىن انىقتايتىن 1 384 دەربەس داچيك ورناتىلعان. تۇراقتى نەگىزدە قۇتقارۋشىلار قاۋىپسىزدىك ەرەجەلەرى تۋرالى ەسكەرتەدى، مىسالى، تامىز ايىنان باستاپ ءورت سوندىرۋشىلەر الماتىنىڭ 67 مىڭنان استام ءۇيىن ارالاپ شىقتى. وسى اينالىمداردىڭ ارقاسىندا ءورت قاۋىپسىزدىگى ەرەجەلەرىن 1،6 مىڭنان استام بۇزۋشىلىق انىقتالدى. نەگىزىنەن بۇزۋشىلىقتار اۆتونومدى جىلىتۋ جۇيەلەرىمەن، ەلەكتر جەلىلەرى مەن ەلەكتر جابدىقتارىنىڭ دۇرىس جۇمىس ىستەمەۋىمەن بايلانىستى.
سونىمەن قاتار، ۇيالى بايلانىس وپەراتورلارىمەن بىرلەسىپ، 15 ملن استام ابونەنتتى قامتي وتىرىپ، جىلىتۋ پەشتەرىن پايدالانۋ كەزىندە ءورت قاۋىپسىزدىگى ەرەجەلەرىن ساقتاۋ تۋرالى SMS-حابارلاما ۇيىمداستىرىلدى (ءار تاراتىلىمدى شامامەن 3،3 ملن ابونەنت قامتۋ).
تجد تۇرعىنداردى جىلۋ بەرۋ كەزەڭىندە ءورتتىڭ الدىن الۋ جانە ادامداردى جاراقاتتاۋدىڭ قاۋىپسىزدىك شارالارىن ساقتاۋعا شاقىرادى. اتاپ ايتقاندا، كەلەسى ۇسىنىستار جاسالدى:
- ۇيدەگى ەلەكتر سىمدارىن قالىپتى جاعدايعا كەلتىرۋ،
- جىلىتۋ ماۋسىمى كەزىندە ءتۇتىن قۇبىرلارىن، جىلىتۋ پەشتەرىنىڭ ءتۇتىن مۇرجالارىن كۇيەدەن تازارتۋعا، ءتۇتىن مۇرجاسىنىڭ ءتۇتىندى تارتۋىن تەكسەرۋ جانە پەش مۇرجاسىن ءتۇنى بويى جابۋعا بولمايدى،
- جىلىتۋ پەشتەرى مەن گاز اسپاپتارىنىڭ جانىندا جيھاز جانە باسقا دا جاناتىن زاتتاردى ورنالاستىرماۋ،
- پەشتەردە، ءتۇتىن مۇرجالارىندا جانە باسقا دا جىلىتۋ اسپاپتارىندا وتىن، كىر جانە باسقا دا جانعىش زاتتاردى كەپتىرۋگە جول بەرمەۋ.