بۇل نورما ەسكى نومىرلەرگە دە قاتىستى.
تەلەفون الاياقتىعىمەن كۇرەسۋ ءۇشىن ءنومىر ساتىپ العاندا بيومەتريالىق سايكەستەندىرۋ ەنگىزىلەدى، دەپ حابارلايدى Almaty-akshamy.kz
بۇل تۋرالى سيفرلىق دامۋ، يننوۆاسيالار جانە اەروعارىش ونەركاسىبى ءمينيسترى باعدات مۋسين ايتتى.
«ءبىز ۇيالى تەلەفوندى تىركەۋ كەزىندە بيومەتريالىق سايكەستەندىرۋدى ەنگىزەمىز. ايتپەسە ءقازىر ءبىر ادامنىڭ اتىنا بالەن ءنومىر راسىمدەلەدى، ولار شەتەلگە شىعارىلادى. سول ارقىلى الاياقتار ارام ويلارىن جۇزەگە اسىرا باستايدى. مۇنىڭ الدىن الۋ ءۇشىن ءبىز نورماتيۆتىك-قۇقىقتىق قۇجاتتارعا قاجەتتى وزگەرىستەر ەنگىزىپ جاتىرمىز. تەحنيكالىق تۇرعىدان دايىنبىز»، - دەدى مۋسين.
ءمينيستردىڭ پىكىرىنشە، وسىدان كەيىن مىڭداعان ءنومىر ساتىپ الىپ، وزىنە راسىمدەيتىن ادامدار سانى ازايادى.
«ەگەر بۇل نومىرلەر ارقىلى الاياقتىق جاسالسا، وندا ونىڭ يەلەرى جاۋاپقا تارتىلادى. ايتپەسە ءقازىر ولار ءبىز بىلگەن جوقپىز دەپ اقتالادى. ال بيومەتريالىق سايكەستەندىرۋ كەزىندە ادام ءنومىردى ساتىپ الاردا بۇل شىنىمەن دە ءوز ءنومىرى ەكەنىن راستايدى»، - دەپ ءتۇسىندىردى مۋسين.
ول بۇل نورما تەك جاڭا نومىرلەر ءۇشىن عانا ەمەس، ەسكى نومىرلەر ءۇشىن دە ەنگىزىلەتىنىن اتاپ ءوتتى.