ماماندار ماسەلەلەردىڭ بارلىعىن قور شەشە المايتىنىن ايتادى.
«قازاقستان حالقىنا» قورى قازاقستاندىقتاردان كەلىپ تۇسەتىن وتىنىشتەردى قابىلداي باستاعان. ءوتىنىش بىلدىرەتىندەر قاتارىندا توي جاساۋعا، ءۇي الۋعا جانە نەسيەسىن تولەۋگە كومەك سۇراعاندار بار، دەپ حابارلادى Almaty-akshamy.kz قازاقپاراتقا سىلتەمە جاساپ.
Qazaqstanhalqyna.kz سايتى ىسكە قوسىلعاننان بەرى «قازاقستان حالقىنا» قورىنا 13 مىڭنان استام ءوتىنىش كەلىپ تۇسكەن. جالپى، بۇگىندە قوردا 115 ميلليارد تەڭگەدەن استام قاراجات جيناقتالعان. شۇعىل ارەكەت ەتۋدى تالاپ ەتەتىن ماسەلەلەر بويىنشا ساراپتامالىق كوميتەتتەر جۇمىس ىستەپ تۇر.
سونىمەن قاتار، سايت پەن الەۋمەتتىك جەلىدەگى مەسسەندجەرلەرگە ءۇي، كولىك ساتىپ الۋ، نەسيە جانە باسقا دا قارجىلىق زايمدار بويىنشا مىندەتتەمەلەردى تولەۋ، وتباسىلىق ءىس-شارالار مەن مەرەكەلىك شارالاردىڭ قاراجاتىن وتەۋ تۋرالى وتىنىشتەر ءالى دە تۇسۋدە.
ەسكە سالايىق، قامقورشىلىق كەڭەسى «قازاقستان حالقى» قورىنىڭ نەگىزگى مىندەتتەرىن كورسەتەتىن تۇجىرىمدامانى بەكىتتى.
وسىلايشا، قۇجاتقا سايكەس، قوردىڭ قىزمەتى بولاشاقتا اۋرۋلاردىڭ جانە مۇگەدەكتىكتىڭ ىقتيمال دامۋىن بولدىرماۋ ماقساتىندا سابيلەرگە مەديسينالىق قىزمەت كورسەتۋدى دامىتۋعا جانە ونىڭ قولجەتىمدىلىگىن ارتتىرۋعا جاردەمدەسۋگە، سپورت جانە ءبىلىم بەرۋ ينفراقۇرىلىمى، سونداي-اق بالالارعا ارنالعان باسقا دا الەۋمەتتىك ماڭىزى بار قىزمەتتەرىنىڭ قولجەتىمدىلىگىن ارتتىرۋعا باعىتتالعان.
سونداي-اق، قور مۇگەدەك، ناۋقاس نەمەسە الەۋمەتتىك بەيىمدەلۋ پروبلەمالارى بار بالانى اسىراپ العان، قورعانشىلىق نەمەسە پاتروناتتىق تاربيەنى ۇيىمداستىرعان وتباسىلارعا كومەك كورسەتۋمەن جانە از قامتىلعان وتباسىلارداعى بالالارعا كومەك كورسەتۋ ءۇشىن مەكتەپتەرمەن ءوزارا ىس-ارەكەت جاساۋمەن اينالىسادى.
سونىمەن قاتار، تىزىمگە قازاقستاننىڭ اۋماقتىق تۇتاستىعى مەن قاۋىپسىزدىگىن قورعاۋ نەمەسە ادامداردىڭ ءومىرىن ساقتاپ قالۋ جانە زارداپ شەككەن تۇرعىندارعا كومەك كورسەتۋ كەزىندە قايتىس بولعان نەمەسە اۋىر جاراقات العان قۇقىق قورعاۋ ورگاندارى، ارنايى ورگاندار، ۇقك قىزمەتكەرلەرىنىڭ وتباسىلارىنا، اسكەري قىزمەتشىلەرىنە، توتەنشە جاعدايلار كەزىندە زارداپ شەككەن ادامدارعا قولداۋ كورسەتۋ كىرەدى.
«بۇل قىزمەت باعىتتارىن قامقورشىلىق كەڭەس بەكىتتى، ال باسقا سالالار قور قىزمەتىندەگى باسىم باعىتتارعا جاتپايدى. سونداي-اق، ءبىز ازاماتتاردىڭ قارجىلىق پروبلەمالارى بولۋى مۇمكىن ەكەنىن تۇسىنەمىز. الايدا بۇل ماسەلەلەردىڭ بارلىعىن قور شەشە المايدى. سوندىقتان تۇجىرىمدامادا كورسەتىلگەن قىزمەت باعىتتارىن مۇقيات وقىپ شىعۋىڭىزدى سۇرايمىز»، - دەدى «قازاقستان حالقىنا» قورىنىڭ رەسمي وكىلى الىبەك ءابدىلوۆ.