كوپشىلىككە جاقسى تانىس «مارگاريتا» پيسساسى نەلىكتەن ايەل ادامنىڭ ەسىمىمەن اتالىپ ءجۇر؟
پيسسا - الەمدەگى ەڭ تانىمال تاعامداردىڭ ءبىرى. كەز كەلگەن پيسسەريانىڭ مازىرىندە مىندەتتى تۇردە «مارگاريتا» اتتى پيسسا بار.
پيسساعا ۇقساس العاشقى تاعامدار مىڭداعان جىلدار بۇرىن دايىندالا باستاعان. ونى ريمدىكتەر دە، ەجەلگى گرەكتەر دە جاساعان. ءبىراق وعان ماڭىزدى كوكونىستىڭ ءبىرى قىزاناق جەتىسپەگەن. قىزاناق ەۋروپاعا وڭتۇستىك امەريكادان تەك XVI عاسىردىڭ باسىندا كەلگەن. سوندىقتان ەجەلگى پيسسا ۇستىنە ىرىمشىك، قىزاناق سالىنعان قاراپايىم قامىر بولعان، دەپ حابارلايدى Almaty-akshamy.kz 24.kz-كە سىلتەمە جاساپ.
قازىرگى پيسساعا ۇقساس تاعام العاش رەت يتاليانىڭ نەاپول قالاسىندا XVI عاسىردىڭ ورتاسىندا دايىندالدى دەگەن بولجام بار. الايدا پيسسا اۋقاتتى ادامدارعا ۇسىنىلاتىن ەليتالىق تاعام بولعان دەپ ويلاماڭىز. كەرىسىنشە، بۇل كەدەيلەردىڭ تاماعى دەپ ەسەپتەلگەن، ءتىپتى كەدەي شارۋانىڭ ءوزى قامىردىڭ قالدىقتارىن جىڭىشكە قۇيماققا اينالدىرىپ، ۇيدەن تاپقانىنىڭ ءبارىن، ياعني ەت، ىرىمشىك جانە شوپتەردى ۇستىنە قوسقان.
قىسقا مەرزىم ىشىندە پيسسا قاراپايىم يتالياندىقتاردىڭ سۇيىكتى تاعامىنا اينالىپ، XVII عاسىردىڭ باسىندا pizzaiolo اتتى ماماندىق تا پايدا بولعان. رizzaiolo - پيسسا پىسىرەتىن ادام. كەيىن اۋقاتتى ادامدار دا پيسسانىڭ ءدامىن تاتادى.
يتاليا كورولىنىڭ ايەلى مارگاريتا ساۆويسكايا 1889 جىلى قاراپايىم ادامداردىڭ تۇرمىسىن باقىلاۋ ءۇشىن ەلدى مەكەندەردى ارالايدى جانە سول جەردەگى شارۋالارعا تاماق دايىنداۋدى وتىنەدى. جەرگىلىكتى اسپازدار پاتشايىمنىڭ كەنەتتەن كەلگەنىنە تاڭعالىپ، وعان ءتان تاعامداردى، ياعني تەڭىز ونىمدەرىن، ەت تابا الماي، اياق استىنان قامىر يلەپ، ۇستىنە ىرىمشىك، قىزاناق جانە اس شوپتەرىن سالىپ دايىندايدى. قاراپايىم تاعامنىڭ پاتشايىمعا ۇناعانى سونشالىق، ونىڭ جەكە اسپازدارى تاعامنىڭ قالاي پىسىرىلەتىنىن جازىپ، مارگاريتاعا ءجيى دايىنداپ بەرۋگە ۋادە ەتەدى.
ءدال وسى پيسسا حانشايىمنىڭ قۇرمەتىنە «مارگاريتا» دەپ اتالا باستايدى.