ونىڭ قوعام ومىرىنە ايتارلىقتاي اسەرى بار.
حالىقتىڭ جالپى سانىنداعى ەگدە جاستاعى ادامدار ۇلەسىنىڭ ارتۋى كوپ ەلدە بايقالادى، دەپ حابارلايدى Almaty-akshamy.kz Ranking.kz پورتالىنا سىلتەمە جاساپ.
الەمدە ايەلدەردىڭ ءومىر ءسۇرۋ ۇزاقتىعى ەر ادامدارعا قاراعاندا ورتا ەسەپپەن 5 جىلعا ارتىق.
2022 جىلدىڭ باسىندا قازاقستاندا 65 جاستان اسقان ايەلدەردىڭ ۇلەسى 10،1%-دى قۇرادى. وسى تۇستا ون جىل بۇرىن بۇل كورسەتكىش تەك 8،2% بولعانىن اتاپ وتكەن ءجون. 65 جاستان اسقان ەر ادامدار ۇلەسى ون جىل ىشىندە 4،8%-دان 6،1%-عا دەيىن ارتقان.
زەرتتەۋگە سايكەس، حالىقتىڭ قارتايۋى ءححى عاسىردىڭ نەگىزگى ۇردىستەرىنىڭ ءبىرى بولىپ وتىر. ونىڭ قوعام ومىرىنە ايتارلىقتاي اسەرى بار. حالىقتىڭ جالپى سانىنداعى ەگدە جاستاعى ادامدار ۇلەسىنىڭ ارتۋى كوپ ەلدە بايقالادى.
بۇۇ-نىڭ بولجامىنا سايكەس، الداعى ونجىلدىقتا دۇنيە جۇزىندە 65 جاستان اسقان ادامدار سانى ەكى ەسە وسەدى. ياعني 2021 جىلعى 761 ميلليوننان 2050 جىلى 1،6 ميللياردقا دەيىن جەتەدى. ال، 80 جاستان اسقان ادامدار سانى ودان دا تەز وسەدى.
بۇۇ بولجامى بويىنشا قازاقستاندا ەگدە جاستاعى دەموگرافيالىق جۇكتەمە كوەففيسيەنتى دە ارتۋى مۇمكىن. ەگەر بىلتىر بۇل كوەففيسيەنتتىڭ ءمانى 12،9%-دى قۇراسا، 2025 جىلعا قاراي – 14،1%، 2030 جىلعا قاراي – 15،9%، 2040 جىلعا قاراي – 17،1%، 2050 جىلعا قاراي 19%-بولادى.
ساراپشىلاردىڭ ايتۋىنشا، بۇل تەندەنسيا كەزىندە ەلدەگى جيناقتاۋشى زەينەتاقى جۇيەسى وڭتايلى نۇسقانىڭ ءبىرى بولىپ قالماق. سەبەبى بۇل مەملەكەتتىك بيۋدجەتكە تۇسەتىن جۇكتەمەنى ازايتىپ قانا قويماي، الداعى ۋاقىتتا جيىنتىق زەينەتاقى مولشەرىن دە ارتتىرا الادى.
جالپى، ەلىمىز زەينەتاقىمەن قامسىزداندىرۋدىڭ تاراتۋ جۇيەسىنەن جيناقتاۋشى تۇرىنە 1998 جىلدان باستاپ بىرتىندەپ كوشە باستاعان ەدى. بولاشاقتا حالىقتىڭ ءومىر ءسۇرۋ ۇزاقتىعىنىڭ ارتۋى كەزىندە جيناقتاۋشى جۇيەنىڭ ماڭىزى ارتا تۇسپەك.
حالىقتىڭ قارتايۋىن ەسكەرە وتىرىپ، الەمدە جيناقتاۋشى زەينەتاقى جۇيەسىنە كوشۋ ءۇردىسى كەڭ تارالۋدا. ەگەر 2001 جىلى تاراتۋ زەينەتاقى جۇيەسى اكتيۆتەرىنىڭ ۇلەسى 62% بولسا، 2021 جىلى بۇل كورسەتكىش 46%-عا دەيىن تومەندەگەن. بۇل رەتتە جيناقتاۋشى زەينەتاقى جۇيەسى اكتيۆتەرىنىڭ ۇلەسى 38%-دان 54%-عا ارتقان بولاتىن.
سوڭعى ون جىلدا جيناقتاۋشى قۇرامداس بولىگى بار زەينەتاقى قورىنىڭ اكتيۆتەرى جىلىنا 9،0%-عا، تاراتۋشى زەينەتاقى قورىنىڭ اكتيۆتەرى جىلىنا 4،8%-عا عانا ۇلعايعانى بايقالىپ وتىر.
جيناقتاۋشى زەينەتاقى جۇيەسى بار ەلدەردىڭ قاتارىندا اقش، اۆستراليا، دانيا، شۆەسيا، گونكونگ، ءۇندىستان، چيلي، يندونەزيا، سينگاپۋر بار. ساراپشىلار بۇل جۇيەنىڭ زەينەتكە شىققانداردىڭ لايىقتى ءومىر ءسۇرۋىنىڭ ەڭ جاقسى كەپىلى دەپ باعالاپ وتىر.