ەكى ەلدىڭ وكىلدەرى EPS جۇيەسى اياسىنداعى ىنتىماقتاستىقتىڭ كەلەشەگىن تالقىلادى.
قازاقستاندىقتار وڭتۇستىك كورەيادا زاڭدى جۇمىسقا ورنالاسۋ قۇقىعىنا يە بولادى، دەپ حابارلايدى Almaty-akshamy.kz
قازاقستان رەسپۋبليكاسى ەڭبەك جانە حالىقتى الەۋمەتتىك قورعاۋ مينيسترلىگىنىڭ جانە كورەيا رەسپۋبليكاسى ەڭبەك جانە جۇمىسپەن قامتۋ مينيسترلىگىنىڭ وكىلدەرى ونلاين-فورماتتا كەلىسسوزدەر جۇرگىزدى.
كەزدەسۋگە كوشى-قون كوميتەتىنىڭ ءتوراعاسى اسقاربەك ەرسايەۆ، حالىقارالىق ىنتىماقتاستىق جانە ينتەگراسيا دەپارتامەنتىنىڭ ديرەكتورى ساادات اسانسەيىتوۆا جانە كورەيا رەسپۋبليكاسى ەڭبەك جانە جۇمىسپەن قامتۋ مينيسترلىگىنىڭ شەتەلدىك جۇمىس ەڭبەگى جونىندەگى باسقارماسى ديرەكتورىنىڭ ورىنباسارى ميۋنگ سۋنگ حون قاتىستى.
ونلاين-كەلىسسوزدەر بارىسىندا قازاقستاندى وڭتۇستىك كورەيانىڭ Employment permit System (EPS) جۇيەسىنە قوسۋ ماسەلەسى تالقىلاندى.
«بۇل قازاقستاندىقتارعا وڭتۇستىك كورەيادا زاڭدى تۇردە جۇمىسقا ورنالاسۋعا، سونداي-اق ولارعا تەڭ ەڭبەك جاعدايلارى مەن قۇقىقتاردى قورعاۋدى قامتاماسىز ەتۋگە مۇمكىندىك بەرەدى»، - دەلىنگەن حابارلامادا.
اسقاربەك ەرسايەۆ كەزدەسۋگە قاتىسۋشىلاردى EPS جۇيەسى شەڭبەرىندە كورەيالىق دايىندىق ورتالىعىن اشۋ بويىنشا جۇرگىزىلىپ جاتقان جۇمىستار تۋرالى حاباردار ەتتى.
قازاقستاندا EPS ورتالىعىن اشۋ مۇمكىندىگىن تالقىلاي وتىرىپ، تاراپتار جەمىستى جانە سىندارلى ءوزارا ءىس-قيمىلعا، سونداي-اق ەڭبەك كوشى-قونى شەڭبەرىندە ەكىجاقتى ىنتىماقتاستىقتى كەڭەيتۋگە دايىن ەكەنىن ءبىلدىردى.