ساۋد ارابياسىنا جۇمىس ساپارى بارىسىندا قازاقستان رەسپۋبليكاسىنىڭ ونەركاسىپ جانە قۇرىلىس ءمينيسترى قانات شارلاپايەۆ Al Masane al Kobra Mining Company (AMAK) باس ديرەكتورى مۇحاممەد اباللالامەن ەكىجاقتى كەزدەسۋ وتكىزدى.
ساۋد ارابياسىنىڭ جەتەكشى جەكە تاۋ-كەن كومپانياسى AMAK وكىلدەرىمەن كەزدەسۋ ەكى ەل اراسىنداعى ىنتىماقتاستىقتىڭ جاڭا كوكجيەگىن اشادى، دەپ حابارلايدى Almaty-akshamy.kz ق ر ونەركاسىپ جانە قۇرىلىس مينيسترلىگىنە سىلتەمە جاساپ.
ءوز دامۋىنىڭ جاڭا كەزەڭىندەگى قازاقستان قاتتى پايدالى قازبالار بويىنشا جەر قويناۋىن پايدالانۋ سالاسىن بەلسەندى دامىتۋدا. ەل تارتىمدى ينۆەستيسيالىق احۋالدى جانە بيزنەستى قولداۋدىڭ اشىق جۇيەسىن ۇسىنادى، بۇل ونى الەمدىك ارەنادا ماڭىزدى سەرىكتەس ەتەدى. قازاقستاندا جەر قويناۋىن پايدالانۋدى دامىتۋ تۋرالى ۇسىنىس ەل رەسۋرستارىنىڭ بايلىعىمەن جانە "AMAK" توبىنىڭ مىس پەن مىرىشتى وندىرۋگە جانە بارلاۋعا قىزىعۋشىلىعىمەن ەرەكشەلەنەدى. مينيستر مەن باس ديرەكتور تاۋ-كەن ءوندىرۋ سالاسىن دامىتۋ جانە قازاقستان مەن ساۋد ارابياسى اراسىنداعى ءوزارا ءتيىمدى بايلانىستاردى نىعايتۋ پەرسپەكتيۆالارىن اتاپ ءوتىپ، ودان ءارى جەمىستى ىنتىماقتاستىققا دايىن ەكەندىكتەرىن راستادى.
بۇدان ءارى ساپار اياسىندا قانات شارلاپايەۆ "Ajlan & Bros Holding Group Abilitii" حولدينگتىك توبىنىڭ ديرەكتورلار كەڭەسىنىڭ ءتوراعاسى ادجلان بين ابدۋلازيز ال-ادجلانمەن كەزدەستى. تالقىلاۋ قازاقستان مەن ساۋد ارابياسى اراسىنداعى، اتاپ ايتقاندا جەر قويناۋىن پايدالانۋ سالاسىنداعى بىرلەسكەن جۇمىستىڭ ماڭىزدىلىعىنا باعىتتالعان. تاراپتار جەرگىلىكتى دەلەگاسيانىڭ ەلىمىزدىڭ الەۋەتىنە مۇددەلىلىگىن جانە ۇزاق مەرزىمدى ىنتىماقتاستىققا دايىندىعىن راستاي وتىرىپ، ءوزارا ءتيىمدى ارىپتەستىكتى دامىتۋ مۇمكىندىكتەرى تۋرالى پىكىر الماستى.
ونەركاسىپ جانە قۇرىلىس ءمينيسترىنىڭ كەلەسى كەزدەسۋىندە التىندى ءوندىرۋ جانە قايتا وڭدەۋ سالاسىنداعى جەتەكشى كومپانيا "Saudi Gold Refinery" باس ديرەكتورى – سۋليمان ال-وتەيممەن بىرلەسكەن باستامالاردى دامىتۋ مۇمكىندىكتەرى تالقىلاندى. ەكى تاراپ قازاقستان مەن ساۋد ارابياسى اراسىنداعى ارىپتەستىكتى نىعايتۋعا باعىتتالعان ديالوگتى جالعاستىرۋعا جانە بولاشاقتا بىرلەسكەن جوبالاردىڭ مۇمكىندىكتەرىن زەرتتەۋگە نيەتتى ەكەندىكتەرىن ءبىلدىردى
ءمينيستردىڭ كەزەكتى ەكىجاقتى كەزدەسۋىندە قازاقستاندا قۇبىر ءوندىرىسىن وقشاۋلاۋ بويىنشا AHQ Group Overview وكىلدەرىمەن ىنتىماقتاستىق پەرسپەكتيۆالارى تالقىلاندى. باستى نازار ەلدەگى ونەركاسىپتى دامىتۋدىڭ ماڭىزدىلىعىنا اۋدارىلدى.AHQ Group Overview-ساۋد ارابياسىنىڭ مۇناي-گاز جانە مۇناي-گاز حيمياسى ونەركاسىبىندە، سونداي-اق قۇبىرلاردىڭ كورروزياسىن باقىلاۋ، بولات قۇبىرلارىن ءوندىرۋ، سۋدى حيميالىق وڭدەۋ، شەگەلەر جانە مىرىشتالعان سىم ءوندىرىسى، سونداي-اق ونەركاسىپتىك جانە مەديسينالىق گاز سەگمەنتتەرى جانە ازىق-تۇلىكتى ۇلكەن كولەمدە وراۋ قىزمەتتەرى سالاسىندا ماماندانعان ءىرى كومپانيالار توبى. بۇگىنگى تاڭدا بۇل قىزمەت باعىتتارى توپتىڭ جالپى بيزنەس قۇرىلىمىندا ماڭىزدى ءرول اتقارادى.
وتكىزىلگەن كەزدەسۋلەر مەن قازاقستاننىڭ ساۋد ارابياسىمەن ءوزارا ءىس-قيمىلىنىڭ جاڭا كوكجيەكتەرى ينۆەستيسيالاۋعا، ەكونوميكالىق بايلانىستاردى نىعايتۋعا جانە وزىق تەحنولوگيالارمەن الماسۋعا ىقپال ەتە وتىرىپ، ەكى ەل اراسىنداعى ستراتەگيالىق قاتىناستاردىڭ ماڭىزدىلىعىن اتاپ كورسەتەدى.