ءار ازاماتقا بىردەي مۇمكىندىك بەرەتىن ءادىل مەملەكەت بولامىز، دەدى بۇگىن قازاقستان حالقى اسسامبلەياسىنىڭ ءحححى سەسسياسىندا ءسوز سويلەگەن قاسىم-جومارت توقايەۆ.
«مەن بۇعان دەيىن ايتقانىمداي، جاڭا قازاقستان دەگەنىمىز – بۇل ادىلەتتى قازاقستان. ءار ازاماتقا بىردەي مۇمكىندىك بەرەتىن ءادىل ءارى دامىعان مەملەكەت بولامىز»، - دەدى پرەزيدەنت اسسامبلەيا مۇشەلەرىنە ارناعان سوزىندە.
مەملەكەت باسشىسى بارلىق جوسپارىمىزدى مىندەتتى تۇردە جۇزەگە اسىراتىنىمىزعا كامىل سەنەتىنىن ايتتى.
«ءبىز ەكىنشى رەسپۋبليكانى بىرگە قۇرامىز، جاڭا قازاقستاندى بىرگە وركەندەتەمىز!»، - دەدى ق. توقايەۆ.
مەملەكەت باسشىسى ۇسىنعان «ەكىنشى رەسپۋبليكا» ۇعىمى شىن مانىسىندە، كەلەشەگى كەمەل ەل قۇرۋدى كوزدەيدى. بيىلعى جولداۋدا ۇسىنىلعان كونستيتۋسيالىق رەفورمالاردىڭ ساياسي ءمانى دە وسىندا – بۇل سۋپەرپرەزيدەنتتىكتەن پرەزيدەنتتىك باسقارۋ فورماسىنا كوشۋ ماقساتىندا «ەكىنشى رەسپۋبليكانىڭ» كونستيتۋسيالانۋى. «ەكىنشى رەسپۋبليكا» مودەلى - قازاقستاننىڭ بيلىك ينستيتۋتتارىن قالىپتاستىرۋدىڭ جاڭا مودەلى. وعان سايكەس پرەزيدەنتتىڭ وكىلەتتىگى قىسقارىپ، پارلامەنت پەن ءماسليحاتتاردىڭ پارمەنى ارتادى. قازاقستاندىقتار مەملەكەت جانە قوعام ىسىنە بەلسەنە اتسالىساتىن بولادى، وسىلايشا، «حالىق ۇنىنە قۇلاق اساتىن مەملەكەت» تۇجىرىمداماسى نىعايا تۇسەدى.
ءسوز سوڭىندا مەملەكەت باسشىسى جۇرتشىلىقتى الدا كەلە جاتقان قازاقستان حالقىنىڭ بىرلىگى كۇنىمەن جانە ورازا ايت مەرەكەسىمەن قۇتتىقتادى.