كونستيتۋسيالىق سوتقا وتىنىشپەن جۇگىنۋ قۇقىعى اتا زاڭنىڭ 72-بابىندا بەكىتىلگەن.
ءوتىنىشتىڭ 90 پايىزى زاڭناما تالاپتارىنا ساي جازىلماعاندىقتان، كەرى قايتارىلعان، دەپ حابارلايدى Almaty-akshamy.kz
كونستيتۋسيالىق سوت ءتوراعاسى ەلۆيرا ءازىموۆانىڭ توراعالىعىمەن ازاماتتاردىڭ كونستيتۋسيالىق سوتقا جولداعان وتىنىشتەرىن قاراۋعا قاتىستى ماسەلەلەر تالقىلاندى.
«بۇگىنگى تاڭدا كونستيتۋسيالىق سوتقا ازاماتتاردان 500-دەن اسا ءوتىنىش كەلىپ ءتۇستى. ولاردىڭ باسىم بولىگى ەكى جىلدان استام ۋاقىت بۇرىن كۇشىنە ەنگەن قىلمىستىق سوت ۇكىمدەرىنىڭ كۇشىن جويۋعا، تەكسەرۋگە جانە قايتا قاراۋعا قاتىستى. ال زاڭعا سايكەس، ازاماتتىڭ ءوتىنىشى، ەگەر ول سوت اكتىسى قابىلدانعاننان كەيىن ءبىر جىلدان كەشىكتىرىلمەيتىن مەرزىمدە بەرىلسە عانا قاراۋعا جاتادى»، - دەپ حابارلادى كونستيتۋسيالىق سوتتىڭ باسپا ءسوز قىزمەتى.
وتىنىشتەردىڭ 60%-تەن استامىندا سوتتار كونستيتۋسيالىق نورمالارعا قايشى كەلەتىن داۋلى اكتىلەردى قولدانعانى نە ازاماتتىڭ قاتىسۋىمەن ازاماتتىق نەمەسە اكىمشىلىك ىستەردەگى قۇقىقتارى مەن بوستاندىقتارىنا تىكەلەي قاتىستى بولعان ناقتى جاعدايلار كورسەتىلمەگەن.
سونداي-اق، ءبىرقاتار ءوتىنىش زاڭدى تۇلعالاردىڭ اتىنان كەلىپ تۇسكەن. ال ازاماتتاردىڭ زاڭدى وكىلدەرى رەتىندە زاڭ كونسۋلتانتتارى پالاتاسىنىڭ مۇشەلەرى، ادۆوكاتتار، سونداي-اق زاڭمەن، جارعىمەن نەمەسە ەرەجەمەن وسى ۇيىم مۇشەلەرىنىڭ نەمەسە باسقا ادامداردىڭ قۇقىقتارى مەن مۇددەلەرىن قورعاۋ قۇقىعى بەرىلگەن ۇيىمداردىڭ ۋاكىلەتتى تۇلعالارى عانا ءوتىنىش بەرە الادى.
كونستيتۋسيالىق سوت اپپاراتىنىڭ مالىمەتىنشە، وتىنىشتەردىڭ 90%-تەن استامى كونستيتۋسيالىق زاڭنىڭ 41، 44، 45-باپتارىنىڭ تالاپتارىن ساقتالماي جولدانعان.
«وسىعان بايلانىستى العاشقى قاراۋ ناتيجەلەرى بويىنشا ازاماتتار مەن ۇيىمدار اتىنان ءوتىنىش بەرۋشىلەردىڭ اتىنا زاڭنامالىق تالاپتاردى تۇسىندىرە وتىرىپ جانە انىقتالعان زاڭبۇزۋشىلىقتار جويىلعان جاعدايدا قايتا جۇگىنۋ مۇمكىندىگى ساقتالاتىنىن كورسەتىپ، ەگجەي-تەگجەيلى جاۋاپتار جولدانىپ جاتىر»، - دەپ اتاپ ءوتتى كونستيتۋسيالىق سوت.
ەلۆيرا ءازىموۆا كەرى قايتارىلعان وتىنىشتەردە كوتەرىلگەن پروبلەمالارعا تالداۋ جاسالاتىنىن ايتتى.
كونستيتۋسيالىق سوتقا ءوتىنىش ەلەكتروندى قۇجات اينالىمىنىڭ ءبىرىڭعاي جۇيەسى، eGov جانە e-Otinish ارقىلى، سونىمەن قاتار قاعاز تۇرىندە قابىلدانادى: استانا قالاسى، ماڭگىلىك ەل كوشەسى، 13 مەكەنجايى، حات-حابارلاردى قابىلداۋ پۋنكتى. تەل: 8(7172) 576398، 576340.