بيىلعى ەگىس ماۋسىمىندا قانداي داقىلدارعا باسىمدىق بەرىلەدى؟

اۋىل شارۋاشىلىعى ءمينيسترى ەربول قاراشوكەيەۆ ۆەدومستۆونىڭ كەڭەيتىلگەن القا ماجىلىسىندە بيىل قانت قىزىلشاسىنىڭ القاپتارى ۇلعايىپ، ماقتا القابى قىسقاراتىنىن ايتتى، دەپ حابارلايدى Almaty-akshamy.kz قازاقپاراتقا سىلتەمە جاساپ. 

«وبلىس اكىمدىكتەرىنىڭ دەرەكتەرى بويىنشا 2023 جىلعى ەگىس الاڭدارىنىڭ بولجامدى الاڭى 23،2 ميلليون گەكتاردى قۇرادى.

ءداندى جانە ءداندى-بۇرشاقتى داقىلداردىڭ ەگىس الاڭدارىن 171،3 مىڭ گەكتارعا جانە قانت قىزىلشاسىن 6،7 مىڭ گەكتارعا ۇلعايتۋ كوزدەلىپ وتىر. سونداي-اق، كوكونىس جانە باقشا داقىلدارىنىڭ 10،2 مىڭ گەكتارعا ارتۋى بولجانۋدا»، - دەدى مينيستر.

ونىڭ ايتۋىنشا، بيىل كۇرىش پەن ماقتادان بولەك، بىرنەشە مايلى داقىلدىڭ القابىندا قىسقارتۋ جوسپارلانىپ وتىر.

«ىلعالدى كوپ قاجەت ەتەتىن داقىلدارعا كەلەتىن بولساق، بيىل ماقتا الاڭىن وتكەن جىلمەن سالىستىرعاندا 13،8 مىڭ گەكتارعا ازايتۋ جوسپارلانىپ وتىر. وسىنىڭ ناتيجەسىندە ول 112،5 مىڭ گەكتار بولادى.

ۇكىمەتتىڭ سۋدى كوپ قاجەت ەتەتىن داقىلدار الاڭىن ازايتۋ جونىندەگى تاپسىرماسىنا قاراماستان، كۇرىش الاڭدارىنىڭ كولەمى وتكەن جىلمەن سالىستىرعاندا 9،9 مىڭ گەكتارعا ۇلعايعان.

وسىعان بايلانىستى، قىزىلوردا جانە تۇركىستان وبلىستارىنىڭ اكىمدىكتەرى بۇل ماسەلەنى باقىلاۋدا ۇستاۋى قاجەت. مايلى داقىلدار بويىنشا دا الاڭدى 191 مىڭ گەكتارعا ازايتۋ جوسپارلانۋدا. بۇل - ماقسارى زىعىر جانە قىشا سياقتى داقىلدار»، - دەدى ەربول قاراشوكەيەۆ.