وندا IPO-عا قاتىسۋدىڭ ناقتى مۇمكىندىگى تۋرالى اقپارات الۋعا بولادى.
قازاقستاندىقتار IPO الاڭىندا الاياقتارعا الدانباۋ ءۇشىن STOPFAKEIPO سايتى قۇرىلدى. سەبەبى بۇگىندە زاڭسىز ينۆەستيسيالىق دەلدالدىڭ بەلگىلەرى بار 158 ۇيىم تىزىمگە الىنعان، دەپ حابارلايدى Almaty-akshamy.kz قازاقپاراتقا سىلتەمە جاساپ.
ق ر قارجى نارىعىن رەتتەۋ جانە دامىتۋ اگەنتتىگىنىڭ ءتوراعاسى ءمادينا ءابىلقاسىموۆانىڭ اتاپ وتۋىنشە، جەكە تۇلعالاردىڭ وتىنىشتەرى مەن شاعىمدارىن قاراۋ بارىسىندا اگەنتتىككە بەلگىلى بولعان الاياقتىقتىڭ ءاربىر فاكتىسى تۋرالى اقپارات قۇقىق قورعاۋ ورگاندارىنا، سونداي-اق الاياقتاردىڭ سايتتارىن بۇعاتتاۋ ءۇشىن ق ر اقپارات جانە قوعامدىق دامۋ مينيسترلىگىنە بەرىلەدى.
«2020 جىلدان باستاپ اگەنتتىك قۇقىق قورعاۋ ورگاندارىنا IPO بويىنشا ينۆەستيسيالاردى جارنامالايتىن الاياقتىق ينتەرنەت-جوبالار بويىنشا اقپاراتتى قوسا العاندا، زاڭسىز ينۆەستيسيالىق دەلدالدىڭ بەلگىلەرى بار 172 ۇيىم بويىنشا اقپارات جولدادى. اگەنتتىك ليسەنزيالانباعان قىزمەت بەلگىلەرى بار، اگەنتتىككە ازاماتتاردىڭ شاعىمدارى تۇسكەن ۇيىمداردىڭ ءتىزىمىن تۇراقتى نەگىزدە جاريالايدى. بۇل تىزىمدە 158 ۇيىم بار. سونىمەن قاتار اگەنتتىكتىڭ سايتىندا رەسەي فەدەراسياسىنىڭ ورتالىق بانكى جاريالاعان قارجى نارىعىندا زاڭسىز قىزمەتتىڭ انىقتالعان بەلگىلەرى بار كومپانيالاردىڭ ءتىزىمى تۋرالى اقپارات، سونداي-اق حالىقارالىق باعالى قاعازدار جونىندەگى كوميسسيالار ۇيىمىنىڭ International Organization of Securities Commissions، IOSCO «ينۆەستيسيالىق كومپانيالار» رەتىندە ءوزىن ورنالاستىراتىن ۇيىمدار تۋرالى ەسكەرتۋلەر مەن ەسكەرتۋلەردىڭ جاريالانۋى تۋرالى اقپارات ورنالاستىرىلعان»، - دەدى ءمادينا ءابىلقاسىموۆا ءماجىلىس دەپۋتاتتارىنىڭ ساۋالىنا بەرگەن جاۋابىندا.
اگەنتتىك ءتوراعاسىنىڭ ايتۋىنشا، «قازمۇنايگاز» اق IPO تاقىرىبىندا الىپساتارلىق جاسايتىن الاياقتاردىڭ قىزمەتىن بولدىرماۋ ماقساتىندا «سامۇرىق-قازىنا» ءۇاق اق كومپانياسى STOPFAKEIPO ارنايى سايتىن قۇرعان. وندا IPO-عا قاتىسۋدىڭ ناقتى مۇمكىندىگى جانە الاياقتاردى قالاي تانۋعا جانە ولاردىڭ قۇربانى بولماۋعا قاتىستى سەنىمدى اقپارات ورنالاستىرىلعان.
«قازمۇنايگاز» ۇك اق، KASE جانە ليسەنزيالانعان بروكەرلىك كومپانيالاردىڭ سايتتارىندا الاياقتار تۋرالى ەسكەرتۋلەر جانە IPO باعدارلاماسىنىڭ باستالۋى تۋرالى سەنىمدى اقپارات ورنالاستىرىلعان. 2022 جىلدىڭ باسىنان باستاپ اگەنتتىككە «قازمۇنايگاز» ۇك اق IPO اياسىندا باعالى قاعازداردى ساتىپ الۋدى ۇسىناتىن الاياقتاردىڭ ارەكەتتەرىنە 4 شاعىم ءتۇستى. بارلىق شاعىمدار ءتيىستى شارالار قابىلداۋ ءۇشىن قۇقىق قورعاۋ ورگاندارىنا، سونداي-اق الاياقتاردىڭ سايتتارىن بۇعاتتاۋ ءۇشىن قازاقستان رەسپۋبليكاسىنىڭ اقپارات جانە قوعامدىق دامۋ مينيسترلىگىنە جىبەرىلدى»، - دەدى ول.