اسكەرگە شاقىرۋ ناۋقانىن وتكىزۋدە ءبىرقاتار ماسەلە بار.
قازاقستاندىق ماماندار اسكەرگە شاقىرىلۋشىلاردى شاقىرۋ كوميسسياسىنا كەلۋگە ماجبۇرلەيتىن زاڭدى تەتىكتەر قاراستىرىلماعانىن ايتىپ وتىر. سوندىقتان ولار ءنورماتيۆتى-قۇقىقتىق اكتىلەرگە ءبىرقاتار وزگەرىس ەنگىزۋدى ۇسىنباق، دەپ حابارلايدى Almaty-akshamy.kz قازاقپاراتقا سىلتەمە جاساپ.
« ەڭ باستىسى – اسكەرگە شاقىرىلۋشىلاردىڭ جۇرگەن جەرىن انىقتاۋ. بىزدە اسكەري ەسەپتە تۇرعانداردىڭ تۇرعىلىقتى جەرى مەن ۋاقىتشا مەكەنجايى حالىققا قىزمەت كورسەتۋ ورتالىعىنىڭ ەلەكتروندى بازاسى ارقىلى ناقتىلاندى. الايدا ولار كورسەتىلگەن مەكەنجايلاردا تۇرمايدى. تاعى 180 ادام قازاستان اۋماعىنان شىعىپ كەتكەن. بۇل - ق ر ۇقك سولتۇستىك قازاقستان وبلىسى بويىنشا دەپارتامەنتى شەكارا قىزمەتىنىڭ بەرگەن مالىمەتى»، - دەيدى پەتروپاۆل قالالىق قورعانىس ىستەرى باسقارماسىنىڭ باسشىسى باۋىرجان ەسەنەيەۆ.
Cپيكەردىڭ ايتۋىنشا، ولار ق ر قىلمىستىق كودەكسىنىڭ 387-بابىنا وزگەرىس ەنگىزۋدى ۇسىنادى: اسكەري قىزمەتتەن وتۋدەن باس تارتقاندارعا، شاقىرۋ ۋچاسكەسىنە، وبلىستىق جيناقتاۋ پۋنكتىنە كەلمەگەندەردى 1 جىلدان 3 جىلعا دەيىن باس بوستاندىعىنان ايىرۋ جازاسىنا كەسۋ.
«ال اسكەرگە بارماۋ ءۇشىن وزىنە-وزى جاراقات سالاتىندارعا، وتىرىك اۋىراتىندارعا، جالعان قۇجات جاسايتىندارعا جانە شاقىرۋ ۋچاسكەسىنە، وبلىستىق جيناقتاۋ پۋنكتىنە ەكى جانە ودان ارتىق كەلمەگەندەرگە 3 جىلدان 6 جىلعا دەيىن جازا كەسۋدى ۇسىنامىز»، - دەيدى باۋىرجان ەسەنەيەۆ.
ماماننىڭ ايتۋىنشا، پەتروپاۆلدا اسكەري ەسەپتە 9 مىڭعا جۋىق اسكەرگە شاقىرىلۋشى تۇرسا، سونىڭ 510-نىڭ جۇرگەن جەرى بەلگىسىز.