بيىل ساۋىردە قازاقستاندا ينتەرنەتكە قولجەتىمدىلىگى بار 17 ملن-نان اسا ۇيالى بايلانىس ابونەنتى تىركەلدى، بۇل بىلتىرعىعا قاراعاندا 5،7%-عا، ال ون جىل بۇرىنعى كورسەتكىشكە قاراعاندا 83،1%-عا كوپ.
سونداي-اق ەلىمىزدە 2،8 ملن ابونەنت ينتەرنەتتى پايدالانادى، ءبىر جىلدا پليۋس 4،9%، ون جىلدا ولاردىڭ سانى 2 ەسە وسكەن، دەپ حابارلايدى Almaty-akshamy.kz Elorda.info-عا سىلتەمە جاساپ.
بۇل قازاقستاندا ينتەرنەتتىڭ ەنۋ دەڭگەيى دامىعان ەلدەرمەن سالىستىرعاندا جوعارى ەكەنىن كورسەتەدى، ءارى ەلەكتروندى كوممەرسيانى ىلگەرىلەتۋ ءۇشىن تاماشا مۇمكىندىك بولىپ سانالادى.
ءقازىردىڭ وزىندە ءبىز بارلىق نارىقتىق فورماسيادا ونلاين رەجيمگە قارقىندى ءوتۋ پروسەسىن بايقاپ وتىرمىز. سوڭعى جىلدارى قولما-قول اقشاسىز تولەمدەر كولەمى دە بىرنەشە ەسە وسكەن. 2022 جىلعى ءبىرىنشى توقساننىڭ قورىتىندىسى بويىنشا بۇل سوما 19،1 ترلن تەڭگەگە جەتتى، بۇل وتكەن جىلمەن سالىستىرعاندا 1،5 ەسەگە ارتىق.
سونىمەن قاتار بيىل ءبىر توقساندا قولما-قول اقشاسىز تولەمدەر كولەمى تولىق 2019 جىلدىڭ كورسەتكىشىنەن 43%، ال 2018 جىلدىڭ كورسەتكىشىنەن 28 ەسە ارتىق بولدى.
ينتەرنەت جانە ۇيالى تەلەفون ارقىلى جاسالعان ونلاين-تولەمدەرگە قولما-قول اقشاسىز ەسەپ ايىرىسۋ كولەمىنىڭ 84،2% تەڭ. مۇنداي ديناميكا – جالپى الەمدىك ترەند. Nasdaq مالىمەتىنشە، 2040 جىلعا قاراي بارلىق ساتىپ الۋلاردىڭ 95% ينتەرنەتتە جاسالادى.
قازاقستاندا قولما-قول اقشاسىز تولەمدەر كولەمىنىڭ ۇلعايۋىمەن قاتار ەلەكتروندى ساۋدا كورسەتكىشتەرى دە ءوسىپ جاتىر. ەگەر 2018-2019 جىلدارى e-Trading ۇلەسى 2،9% جانە 3،8% بولسا، 2020 جىلى بۇل كورسەتكىش 3 ەسە ءوسىپ، 9،7% جەتتى.
سونداي-اق ەگەر تاۋارلار مەن قىزمەتتەردى ونلاين ساتىپ العان ينتەرنەت پايدالانۋشىلاردى ەسەپكە الساق، ولاردىڭ ۇلەسى 2019 جىلى 15،6%-دان 2020 جىلى 17،7%-عا دەيىن ءوستى.
بۇگىندە ينتەرنەتتەن كەز-كەلگەن تاۋاردى ساتىپ الۋعا بولادى، ياعني كۇندەلىكتى تۇرمىسقا قاجەت قاراپايىم زاتتاردان باستاپ، سيرەك كەزدەسەتىن جانە ەكسكليۋزيۆتى تاۋارعا دەيىن.
قازاقستاندا ينتەرنەتتە ەڭ كوپ ساتىلاتىن تاۋارلار: كيىم، اياق-كيىم، سپورت تاۋارلارى، ازىق-تۇلىك، ۇيدە پايدالانۋعا ارنالعان تاۋارلار، دارى-دارمەك، تەلەكوممۋنيكاسيا قىزمەتتەرى، ەلەكتروندى جابدىقتار، قارجىلىق جانە ساقتاندىرۋ قىزمەتتەرى، كومپيۋتەرلىك تاۋارلار جانە تاعى باسقا.
سونىمەن قاتار قازىرگى تاڭدا ونلاين كولىك ساتىپ الۋعا، يپوتەكا راسىمدەۋگە دە مۇمكىندىك بار.