ەكولوگتاردىڭ بولجامى.
قازاقستاندىق ەكولوگتار ۇستىمىزدەگى جىلى كيىك سانى ءبىر ميلليوننان اسادى، دەپ بولجاپ وتىر. 2021 جىلدىڭ قورىتىندىسى بويىنشا ەلىمىزدە 842 مىڭ كيىك بار، دەپ حابارلايدى Almaty-akshamy قازاقپاراتقا سىلتەمە جاساپ.
ماماننىڭ ايتۋىنشا، كيىكتەردىڭ تولدەۋى جىل سايىن ءساۋىردىڭ سوڭىنان مامىردىڭ ورتاسىنا دەيىن جالعاسادى.
«ءبىز جىل سايىن كيىكتەردىڭ ەسەبىن جۇرگىزەمىز. بۇگىنگە دەيىن ەلىمىزدە البينوس كيىك ءتولىنىڭ تۋۋ جاعدايى تىركەلمەدى. قازاقستاندا كەڭ تاراعان ءۇش كيىك ءتۇرى بار. ول ءۇستىرت كيىكتەرى، بەتپاقدالا جانە ورال كيىكتەرى. وتكەن جىلدىڭ ەسەبى بويىنشا ەلىمىزدە 842 مىڭ كيىك بار. بيىل اتالعان كورسەتكىش ارتا تۇسەدى دەگەن ۇمىتتەمىز. شامامەن 1،2 ملن كيىككە جەتەدى دەگەن بولجام بار. جالپى الەم بويىنشا كيىكتەردىڭ 90 پايىزى ءبىزدىڭ ەلىمىزگە تيەسىلى»، - دەيدى «وحوتزووپروم» رەسپۋبليكالىق مەكەمەسىنىڭ ءبولىم باسشىسى ازامات اقايەۆ.
جىل سايىن كيىكتەر ەسەبى ولار تولدەپ بولعاننان كەيىن جۇرگىزىلەدى. ال ونىڭ قورىتىندىسى جىل سوڭىندا دايىن بولادى.
«كيىكتەر تولدەپ جاتقاندا كەدەرگى كەلتىرۋگە بولمايدى. ياعني ولاردى مازالاماۋ كەرەك. سول سياقتى كيىكتەرگە ساناق جۇرگىزۋ عىلىمي ۇيىمدار بەكىتكەن ادىسكە سايكەس جۇزەگە اسىرىلادى. ساناق نەگىزىنەن تىكۇشاقتىڭ كومەگىمەن جۇرگىزىلەدى. كيىكتەردىڭ تولدەۋ پروسەسىن قۇزىرلى ورگاندار جانە سالالىق عىلىمي مەكەمەلەردىڭ وكىلدەرى مەن ماماندارى قاداعالايدى. جاعدايدى جىل بويى زەردەلەپ، جىل اياعىندا ونىڭ قورىتىندىسىن شىعارادى»، - دەدى مامان.
«وحوتزووپروم» وكىلىنىڭ مالىمدەۋىنشە، ەلىمىزدە جىل ساناپ كيىكتەردىڭ كوبەيۋى بايقالادى.
«باقىلاۋ مەن قابىلدانىپ جاتقان شارالارعا قاراماستان براكونەرلىك فاكتىلەر بار. ءبىزدىڭ ينسپەكتورلار كيىك اۋلاۋشىلارمەن كۇرەستى تاۋلىك بويى جۇرگىزەدى. كيىك اۋلاۋ – ول قىلمىس. قىلمىستىڭ الدىن الۋ ماقساتىندا قۇزىرلى ورگاندارمەن بىرلەسىپ ءتيىستى شارالار قابىلدانىپ، قولدانىسقا ەنىپ جاتىر»، - دەيدى ازامات اقايەۆ.