ينۆەستيسيا سالۋ دەگەن الاياقتىقتىڭ جاڭا ءتۇرى پايدا بولدى

الاياقتار قازاقستاندىقتاردى الداۋدىڭ جاڭا ءادىسىن ويلاپ تاپتى.

الەۋمەتتىك جەلىدە الاياقتار قازاقستاندىقتاردى تانىمال كومپانيالاردىڭ اكسيالارىنا ينۆەستيسيا سالۋعا شاقىرىپ جاتىر، دەپ حابارلايدى Almaty-akshamy.kz

قازاقستاندىق مىس ءوندىرۋشى KAZ Minerals كومپانياسى الاياقتىق فاكتىلەرىنىڭ كوبەيگەنى تۋرالى مالىمدەدى.

بۇل جولى الاياقتار قازاقستاندىقتاردىڭ دەربەس دەرەكتەرى مەن جەكە جيناعىن قولعا تۇسىرۋگە تىرىسىپ، كومپانيانىڭ اتىن پايدالانا باستاعان. اسىرەسە، الەۋمەتتىك جەلىدە بەلسەندىلىك ارتىپ تۇر. مۇندا جالعان جارناماعا سىلتەمەلەر مەن جازبالار جاريالانىپ جاتىر، دەپ مالىمدەدى KAZ Minerals باسپا ءسوز قىزمەتى.

«سوڭعى ۋاقىتتا الاياقتار قارجى ينستيتۋتتارىمەن شەكتەلمەي، ەكونوميكانىڭ باسقا سەكتورىنداعى تابىستى قازاقستاندىق برەندتەردى، سونىڭ ىشىندە KAZ Minerals كومپانياسىنىڭ اتاۋىن حالىقتى الداپ سوعۋ ماقساتىندا قولدانىپ جاتىر»، - دەدى KAZ Minerals توبىنىڭ كورپوراتيۆتىك بايلانىس دەپارتامەنتىنىڭ باسشىسى ماقسۇت جاپابايەۆ.

ول كومپانيا جاقىندا عانا بيرجادان كەتكەنىن، جەكە مەنشىككە وتكەنىن مالىمدەدى. سوندىقتان ءقازىر ونىڭ اكسيالارى ەركىن اينالىمدا جوق.

«ءبىز كومپانيانىڭ ازاماتتارعا ارنالعان ينۆەستيسيالىق باعدارلامالاردى جۇزەگە اسىرمايتىنىن رەسمي تۇردە مالىمدەيمىز. وسى ورايدا قازاقستاندىقتاردى ساق بولۋعا، اقپاراتتىق قاۋىپسىزدىك ەرەجەلەرىن ساقتاۋعا، جەكە دەرەكتەرىن ەشكىمگە حابارلاماۋعا، كومپانيانىڭ رەسمي رەسۋرستارىندا كۇماندى اقپاراتتى قايتا-قايتا تەكسەرۋگە شاقىرامىز»، - دەدى ماقسۇت جاپابايەۆ.

كومپانيا ءتيىستى ۆەدومستۆولارعا، سونىڭ ىشىندە قازاقستاننىڭ ىشكى ىستەر مينيسترلىگى جانە سيفرلىق دامۋ، يننوۆاسيالار جانە اەروعارىش ونەركاسىبى مينيسترلىگىنە ۇندەۋ حاتتار دايىنداپ جاتىر.