4 جەلتوقساننان باستاپ enpf-otbasy.kz پلاتفورماسى ارقىلى وفتالمولوگيالىق قىزمەتتەردى ءبىرجولعى زەينەتاقى تولەمدەرى (بزت) ەسەبىنەن تولەۋگە ءوتىنىم قابىلداۋ توقتاتىلادى، دەپ حابارلايدى aqshamnews.kz
بانك مالىمەتىنشە، اتالعان كۇنگە دەيىن بەرىلگەن بارلىق وتىنىمدەر قابىلدانىپ، قولدانىستاعى تارتىپكە ساي قارالادى.
- وفتالمولوگيالىق قىزمەتتەر بويىنشا ءوتىنىم قابىلداۋدىڭ توقتاتىلۋى دەنساۋلىق ساقتاۋ مينيسترلىگىنىڭ ءبىرجولعى زەينەتاقى تولەمدەرىن ەمدەلۋگە پايدالانۋ قاعيدالارىنا ەنگىزگەن وزگەرىستەرىمەن بايلانىستى. 2025 جىلعى 3 جەلتوقساندا جاريالانعان بۇيرىققا سايكەس، ستوماتولوگيامەن قاتار وفتالمولوگيا دا زەينەتاقى قاراجاتىن پايدالانۋعا بولاتىن باعىتتار تىزىمىنەن الىنىپ تاستالدى، دەپ حابارلادى قارجى ۇيىمى.
وتباسى بانكىنىڭ دەرەگىنشە، ءقازىر «وفتالمولوگيا» باعىتى بويىنشا جالپى سوماسى 13،3 ملرد تەڭگەنى قۇرايتىن 15 808 ءوتىنىم قارالىپ جاتىر.
ونىڭ ىشىندە 4،6 ملرد تەڭگەگە تەڭ 5 مىڭنان استام ءوتىنىم بويىنشا قۇجاتتاردى تەكسەرۋ ءجۇرىپ جاتىر، ال 10 677 ءوتىنىم (8،7 ملرد تەڭگە) يەلەرىنەن قوسىمشا دالەلدەيتىن قۇجاتتار سۇرالعان.
- ستوماتولوگيالىق قىزمەتتەر بويىنشا ءوتىنىم قابىلداۋ توقتاعاننان كەيىن وفتالمولوگياعا جۇگىنۋشىلەر كۇرت كوبەيدى. ەگەر 15 قىركۇيەككە دەيىن ايىنا ورتا ەسەپپەن 174 ءوتىنىم ماقۇلدانسا، شەكتەۋ ەنگىزىلگەننەن كەيىن بۇل كورسەتكىش ايىنا 1 264 ماقۇلدانعان وتىنىمگە دەيىن ءوستى — ءوسىم 7 ەسەدەن اسادى، دەدى بانك.
بانك ماماندارى بىرنەشە كۇماندى جاعدايدى انىقتاعاندارىن دا اتاپ ءوتتى.
- ءارتۇرلى كليەنتتەردەن ءبىر وفتالمولوگيالىق كلينيكامەن كەلىسىمشارت جاسالعان وتىنىمدەر تۇسكەن. الايدا قۇجاتتاردا كلينيكانىڭ ءار قالادا ءارتۇرلى مەكەنجايى كورسەتىلگەن. تەكسەرۋ بارىسىندا ول مەكەنجايلاردا مۇنداي كلينيكا جوق ەكەنى بەلگىلى بولدى، دەپ مالىمدەدى ۇيىم.
سونىمەن قاتار بانك وكىلدەرى قازاقستاندىقتار ءۇشىن زەينەتاقى جيناعىن ومىرلىك ماڭىزى بار قىمبات ەمدەرگە پايدالانۋ مۇمكىندىگى ءالى دە بار ەكەنىن ايتتى.