ەكولوگيا مينيسترلىگىنىڭ مالىمەتىنشە، قازاقستانداعى كيىكتەردىڭ سانى بۇگىن رەكوردتىق دەڭگەيگە جەتتى – 4 ملن باس، سونداي-اق تولدەۋدەن كەيىن 2026 جىلى شامامەن 5 ملن باستى قۇرايدى، دەپ حابارلايدى aqshamnews.kz
بۇل تۋرالى پرەمەر-مينيستردىڭ ءبىرىنشى ورىنباسارى رومان سكلياردىڭ توراعالىعىمەن وتكەن كەڭەستە بەلگىلى بولدى.
وسىنداي قارقىندى ءوسۋدى ەسكەرە وتىرىپ، ۋاكىلەتتى ورگاندار زوولوگيا ينستيتۋتى دايىنداعان بيولوگيالىق نەگىزدەمە نەگىزىندە اۋىل شارۋاشىلىعىنا زيان كەلتىرمەۋ جانە ەكوجۇيەلىك تەپە-تەڭدىكتى ساقتاۋ ءۇشىن جانۋارلار سانىن تۇراقتى باسقارۋ بويىنشا ءىس-شارالار جۇرگىزدى، – دەپ جازىلعان حابارلامادا.
ماسەلەن، وسى جىلى 1 شىلدەدەن 30 قاراشاعا دەيىن 196 مىڭعا جۋىق كيىك تاركىلەندى، ۇشالارى وتاندىق ەت وڭدەۋ كاسىپورىندارىنا بەرىلدى. جۇمىستار عىلىمي ۇسىنىمدارعا سايكەس قاتاڭ تۇردە جۇرگىزىلدى.
دەريۆاتتاردى ەسەپكە الۋعا جانە ساقتاۋعا ەرەكشە نازار اۋدارىلادى. كيىكتەردىڭ بارلىق ءمۇيىزى تاڭبالانىپ، مينيسترلىككە ۆەدومستۆولىق باعىنىستى "وحوتزووپروم" ءوب" رمقك ۇيىمىندا كۇشەيتىلگەن كۇزەت جانە مامانداندىرىلعان ينفراقۇرىلىم جاعدايلارىندا ساقتالادى.
دەريۆاتتاردى سيفرلىق تاڭبالاۋ جانە حالىقارالىق رەتتەۋ ماسەلەلەرى جەكە قارالدى. "قازاقتەلەكوم" اق-مەن بىرلەسىپ تولىق قاداعالاۋدى جانە زاڭدى اينالىمدى قامتاماسىز ەتەتىن كيىك مۇيىزدەرىن تاڭبالاۋ جوباسى جۇزەگە اسىرىلۋدا، – دەپ جازىلعان اقپاراتتا.
ۇسىنىلعان جۇيە CITES حالىقارالىق كونفەرەنسياسىندا قولداۋ تاپتى جانە قازاقستاندىق دەريۆاتتاردىڭ ەكسپورتىنا شەكتەۋلەردى كەزەڭ-كەزەڭىمەن الىپ تاستاۋ ءۇشىن نەگىز رەتىندە قاراستىرىلادى.
جيىن قورىتىندىسى بويىنشا رومان سكليار ەكولوگيا جانە تابيعي رەسۋرستار مينيسترلىگىنە جانە باسقا دا مۇددەلى مەملەكەتتىك ورگاندارعا 2026 جىلعا كيىك سانىن تۇراقتى باسقارۋعا دايىندىق بويىنشا شارالار قابىلداۋدى تاپسىردى.