الماتى اكىمدىگىندە قالا اكىمى دارحان ساتىبالدىنىڭ توراعالىعىمەن «تازا قازاقستان» ەكولوگيالىق باعدارلاماسىن جۇزەگە اسىرۋ ماسەلەلەرى بويىنشا كەڭەس ءوتتى، دەپ حابارلايدى aqshamnews.kz
وندا قالانىڭ سانيتارلىق جاعدايى، جالپى قالالىق سەنبىلىككە دايىندىق جانە ەكولوگيالىق ايلىقتى وتكىزۋ بارىسى تالقىلاندى.
قالالىق ەكولوگيا جانە قورشاعان ورتا باسقارماسى حابارلاعانداي، 11 قازان مەن 11 قاراشا ارالىعىندا تازالىق، اباتتاندىرۋ جانە ەكولوگيالىق مادەنيەتتى ارتتىرۋ باعىتىندا 19 ءىس-شارانى قامتيتىن جوسپار بەكىتىلدى.
ايلىق اياسىندا «جاسىل مەكتەپ» جانە «جاسىل اۋلا» اكسيالارى، كوشەنى، ارىق جەلىسىن، ايالداما مەن جۇرگىنشىلەر وتكەلىن سانيتارلىق تازالاۋ، سونداي-اق ەكومادەنيەتكە ارنالعان ينتەراكتيۆتى ساباقتار وتكىزىلەدى.
11 قازاندا الماتىنىڭ بارلىق اۋداندارىندا جالپى قالالىق سەنبىلىك ۇيىمداستىرىلادى. وعان 5 مىڭنان استام ادام قاتىسادى دەپ جوسپارلانعان. قالا بويىنشا 23 مەكەنجايدا اۋماقتاردى تازالاۋ، اعاش پەن بۇتا وتىرعىزۋ جانە مادەني-تانىمدىق ءىس-شارالار وتەدى.
سەنبىلىك وتەتىن ورىنداردىڭ قاتارىندا: بورالداي وزەنى بويىنداعى سكۆەر (الاتاۋ اۋدانى)، ابىلاي حان داڭعىلى (المالى اۋدانى)، سەيفۋللين داڭعىلى مەن جانسۇگىروۆ كوشەسىنىڭ قيىلىسى (جەتىسۋ اۋدانى)، «دوستىق» ساياباعى (بوستاندىق اۋدانى)، ەسەنتاي وزەنى (مەدەۋ اۋدانى)، «تاستىبۇلاق» سكۆەرى (ناۋرىزباي اۋدانى)، «جاس قانات» شاعىناۋدانى (تۇركسىب اۋدانى) بار.
بۇدان بولەك، قىركۇيەك ايىنىڭ سوڭىنان بەرى 100 مىڭ بۇتا وتىرعىزۋ جۇمىسى جۇرگىزىلۋدە. قازىرگى ۋاقىتتا 10،5 مىڭنان استام وسىمدىك ەگىلىپ، 15 مىڭ وتىرعىزۋ شۇڭقىرى دايىندالدى. جۇمىس سەگىز اۋداننىڭ 13 ۋچاسكەسىن قامتيدى.
كەڭەس بارىسىندا جەكە سەكتورلارمەن ىنتىماقتاستىقتىڭ جاڭا باعىتتارى تانىستىرىلدى. Fabriqa جوباسى اياسىندا توقىما قالدىعىن جيناۋعا ارنالعان 32 كونتەينەر ورناتىلىپ، تاۋلىگىنە 1،5 توننادان استام ماتا قالدىعى شىعارىلادى. سونىمەن قاتار «باقىتتى وتباسى» الەۋمەتتىك ورتالىعىمەن بىرلەسىپ، ايەلدەردى جۇمىسپەن قامتۋ جانە قايتا وڭدەلگەن ماتەريالداردان ءونىم جاساۋ باعدارلاماسى ىسكە اسىرىلىپ جاتىر.
Eco Network ەكوحابىنىڭ جەتەكشىسى ەۆگەنيي مۇحامەدجانوۆتىڭ ايتۋىنشا، الماتىدا قالدىقتى بولەك جيناۋ ينفراقۇرىلىمى دامىپ كەلەدى. ءقازىردىڭ وزىندە 560 توننادان استام ماتەريال قايتا وڭدەۋگە جىبەرىلگەن. قالادا 70 فاندومات ورناتىلىپ، ولار ارقىلى 176 مىڭ پلاستيك بوتەلكە مەن 45 مىڭ اليۋمينيي قالبىر جينالعان.
كەڭەس قورىتىندىسىندا دارحان ساتىبالدى ەكولوگيالىق ايلىق شەڭبەرىندەگى بارلىق ءىس-شارالاردىڭ ساپالى ءوتۋىن قامتاماسىز ەتۋدى تاپسىردى. اسىرەسە قوعامدىق كەڭىستىكتەردىڭ، ارىق جەلىلەرىنىڭ جانە اۋلالاردىڭ سانيتارلىق جاعدايىنا ەرەكشە نازار اۋدارۋ قاجەتتىگىن اتاپ ءوتتى.
قالا اكىمى اتاپ وتكەندەي، «تازا قازاقستان» باعدارلاماسى – تازالىق مادەنيەتىن قالىپتاستىرۋعا جانە قورشاعان ورتاعا جاۋاپكەرشىلىكپەن قاراۋعا باعىتتالعان ماڭىزدى باستاما.