قازاقستاندىق تۋريستەر يتالياعا كارانتينسىز بارا الادى

1 ناۋرىزدان باستاپ پتر-تەستىنىڭ تەرىس ناتيجەسى بار قازاقستاندىقتار يتاليا اۋماعىنا كارانتينسىز كىرە الادى

قازاقستان رەسپۋبليكاسىنداعى يتاليا ەلشىلىگىنىڭ سايتىندا حابارلانعانداي، يتالياعا تۋريستىك ساپارلارعا قولدانىستاعى شەكتەۋلەر توقتاتىلادى، ياعني 1-31 ناۋرىز ارالىعىندا قازاقستاندىقتارعا ەۋروپا ەلىنە كىرۋگە رۇقسات ەتىلەدى، دەپ حابارلايدى Almaty-akshamy.kz 

قازاقستان رەسپۋبليكاسىنداعى يتاليا ەلشىلىگىندە بۇل ءۇشىن كەلەسى قۇجاتتار قاجەت ەكەنىن اتاپ ءوتتى:

1. ساۋالناما؛


2. كەلەسى قۇجاتتاردىڭ ءبىرى: ەۋروپالىق دارىلىك زاتتار اگەنتتىگى تانىعان پرەپاراتپەن كوروناۆيرۋسقا قارسى ۆاكسيناسيالاۋ تۋرالى انىقتاما، ول ۆاكسيناسيالاۋدىڭ تولىق ءبىرىنشى كۋرسىن اياقتاعاننان كەيىن نەمەسە ريەۆاكسيناسيادان وتكەننەن كەيىن بەرىلۋى ءتيىس. ەگەر ۆاكسيناسيا تۋرالى انىقتاما بولماسا، وندا 180 كۇننەن اسپايتىن ۋاقىت وتكەن ءتيىستى ءوزىن-وزى وقشاۋلاۋ كەزەڭىنىڭ اياقتالۋ كۇنىن كورسەتە وتىرىپ، ساۋىعۋ تۋرالى انىقتامانى ۇسىنۋعا رۇقسات ەتىلەدى. سونداي-اق، تەرىس ناتيجەسى بار انتيگەندىك جەدەل تەست (جارامدىلىق مەرزىمى 48 ساعات) نەمەسە مولەكۋلالىق پتر تەستى (جارامدىلىق مەرزىمى 72 ساعات) تۋرالى انىقتاما بەرۋگە بولادى.

انىقتامالاردىڭ ءبىرى بولماعان جاعدايدا ساياحاتشى بەس كۇندىك كارانتيندى وتەۋگە، ال كارانتيننەن كەيىن كوروناۆيرۋستىق ينفەكسياعا تەستىلەۋدەن وتۋگە مىندەتتى.