دۇنيەجۇزىلىك ازاماتتىق قورعانىس كۇنى شەڭبەرىندە 1 ناۋرىز ساعات 9.00-دەن 12.00-گە دەيىن ازاماتتىق قورعاۋدىڭ قۇلاقتاندىرۋ جۇيەسىنە رەسپۋبليكالىق تەكسەرۋ جۇرگىزىلەدى.
توتەنشە جاعداي مينيسترلىگىنىڭ مالىمەتىنشە، حالىقتى قۇلاقتاندىرۋ جانە حاباردار ەتۋ - تۇرعىنداردى تابيعي قۇبىلىستاردىڭ ءارتۇرلى فاكتورلارىنىڭ اسەرىنەن بولاتىن اپاتتىڭ نەمەسە جويقىن اسەردىڭ تەرىس سالدارىنان قورعاۋعا مۇمكىندىك بەرەتىن نەگىزگى قاۋىپسىزدىك شاراسى، دەپ حابارلايدى Almaty-akshamy.kz قازاقپاراتقا سىلتەمە جاساپ.
قۇلاقتاندىرۋ جۇيەسىن تەكسەرۋ بارىسىندا ەلەكتر دابىلدارىن جانە سيرەنالىق-سويلەۋ قۇرىلعىلارىن (داۋىس زورايتقىشتاردى) قىسقا مەرزىمگە قوسۋ، سونداي-اق تەلەديدار جانە راديوارنالارىنىڭ ەفيرىن ۇستاپ الۋدى جۇزەگە اسىرۋ، ينتەرنەت-رەسۋرستار مەن ءموبيلدى قوسىمشالاردا اقپاراتتى ورنالاستىرۋ كوزدەلەدى. «بارشانىڭ نازارىنا!!!» دىبىستىق سيگنالى - بۇل ءقاۋىپ تونگەن نەمەسە توتەنشە جاعداي تۋىنداعان كەزدە بارلىق شۇعىل حابارلامالاردى بەرۋدىڭ الدىندا حالىقتىڭ نازارىن اۋدارۋ ءۇشىن بەرىلەتىن ەسكەرتۋ سيگنالى.
دىبىستىق سيگنالدى ەستىگەن كەزدە تەلەديدارلار مەن راديوقابىلداعىشتاردى قوسۋ كەرەك، ينتەرنەت-رەسۋرستارداعى جانە ءموبيلدى قوسىمشالارداعى اقپاراتتى تۋىنداعان جاعدايدا ودان ءارى ارەكەت ەتۋ تۋرالى نۇسقاۋلار الۋ ءۇشىن وقىپ شىعۋ كەرەك. سونىمەن قاتار، ءقاۋىپتى وندىرىستىك وبەكتىلەر مەن گيدروتەحنيكالىق قۇرىلىستارداعى جەرگىلىكتى قۇلاقتاندىرۋ جۇيەلەرىنىڭ جارامدىلىعى تەكسەرىلەتىن بولادى. قۇلاقتاندىرۋ جۇيەسىنە رەسپۋبليكالىق تەكسەرۋ جۇرگىزۋ قۇلاقتاندىرۋ جابدىعىن ازىرلىكتە ۇستاۋعا جانە حالىقتى ىقتيمال توتەنشە جاعدايلاردان قورعاۋعا باعىتتالعان.