ءقازىر ۋكرايناداعى قازاقستاندىق جۇرگىزۋشىلەردىڭ ومىرىنە، سونىمەن قاتار كولىك كومپانيالارىنىڭ تاۋاردى جەتكىزۋ جانە ساقتاۋعا قاتىستى مىندەتتەمەلەرىنە ءقاۋىپ ءتونىپ تۇر.
«اتامەكەن» ۇلتتىق كاسىپكەرلەر پالاتاسى سوعىس ءىس-قيمىلدارىنىڭ باستالۋىنا بايلانىستى ۋكراينادان شىعا الماي جاتقان جانە كورشى مەملەكەتتەردىڭ شەكارا ماڭى ايماقتارىندا ورنالاسقان وتاندىق جۇك كولىكتەرى تۋرالى دەرەكتەر جيناۋعا باستاماشى بولدى.
«اتامەكەن» ۇكپ مالىمەتىنشە، ءقازىر 24 جۇك كولىگى ۋكراينادان شىعا الماي تۇر، دەپ حابارلايدى Almaty-akshamy.kz
ولاردىڭ كوبى كييەۆ وبلىسىندا تۇرىپ قالعان، 3 كولىكتىڭ عانا جۇگى جوق.
«ءبىز اقپاراتتى جەدەل جيناۋ ماقساتىندا جۇرگىزۋشىلەردىڭ بارلىق چاتىنا ارنايى، سالالىق قاۋىمداستىقتارعا فورمانى تاراتتىق. تۇسكەن اقپاراتتى ۋاكىلەتتى ورگاندارعا كەلگەن بويدا جىبەرىپ جاتىرمىز. سونداي-اق، ۆەدومستۆولارعا حات جولداپ، قازاقستاندىق تاسىمالداۋشىلاردىڭ ۋكراينا اۋماعىنان پولشا، بەلارۋس رەسپۋبليكاسى ارقىلى شىعۋى ءۇشىن «جاسىل ءدالىزدى» قامتاماسىز ەتۋ ماسەلەسىن رەسەي، بەلارۋس، ۋكراينا، پولشا جانە باسقا دا تاراپتارمەن پىسىقتاۋدى سۇرايمىز»، – دەدى «اتامەكەن» ۇكپ لوگيستيكا جانە تاسىمالداۋ دەپارتامەنتىنىڭ ديرەكتورى مۇرات امرين.
ۇكپ دەرەكتەردى جيناۋدى جالعاستىرادى. ەگەر ءسىز نەمەسە كولىك جۇرگىزۋشى ۋكراينادان شىعا الماي جاتسا، دەرەگىڭىزدى مىنا نومىرگە جولداۋدى سۇرايمىز: 1432، +7 778-870-1432 (ۇكپ بايلانىس ورتالىعى).