قازاقستاندىق تەننيسشى تيموفەي سكاتوۆ ەرەكشە ماراپاتقا يە بولدى

ول توپىراق توسەنىشىندەگى كورتتاردا جاقسى ونەر كورسەتتى.

قازاقستاندىق تەننيسشى تيموفەي سكاتوۆ ATP Challenger ماۋسىمىنىڭ قورىتىندىسى بويىنشا جىل جاڭالىعى رەتىندە تانىلدى، دەپ حابارلايدى Almaty-akshamy.kz.

كاسىبي تەننيسشىلەر قاۋىمداستىعى (ATP) ت.سكاتوۆتى 2022 جىلى چەللەندجەر تۋرنيرلەرىندە ءوزىن ەڭ جاقسى قىرىنان كورسەتكەن بەس ويىنشىنىڭ قاتارىنا قوستى.

اتالعان قاۋىمداستىقتىڭ رەسمي سايتىنان ءمالىم ەتكەنىندەي، پارمادا (يتاليا) ءوزىنىڭ العاشقى تيتۋلىن جەڭىپ العان 21 جاستاعى ت.سكاتوۆ 2022 جىلى ATP Challenger Tour جارىستارىندا چەمپيون اتانعان جالعىز قازاقستاندىق بولدى. الەمنىڭ 142-راكەتكاسى فينالدا وسىعان دەيىن توعىز ماچتا قاتارىنان جەڭىسكە جەتكەن سلوۆاكيالىق يۋزەك كوۆاليكتى ۇتتى.

تيموفەي سكاتوۆ توپىراق توسەنىشىندەگى كورتتاردا جاقسى ونەر كورسەتتى. بيىل ول كوكيمبو، ليسسابون، براگا، سيەۆيليا، روزەتو-دەليا-ابرۋسسي-2 جانە پارما چەللەندجەر دودالارىندا جارتىلاي فينالعا دەيىن جەتتى. قىركۇيەك پەن قازاندا قازاقستاندىق تەننيسشى 16 ويىننىڭ 14-ىندە جەڭىسكە جەتتى. ال Coquimbo Challenger جارىسىندا دۇنيەجۇزىلىك رەيتينگتە وزىنەن الدەقايدا جوعارى تۇرعان، الەمنىڭ 71-راكەتكاسى فەدەريكو كوريانى تىزە بۇكتىردى.