قازاقستاندىق سپورتشى تاي-برەيكپەن اياقتالعان ەكى پارتيادا باسىم ءتۇستى
قازاقستاندىق، الەمنىڭ 233-راكەتكاسى تيموفەي سكاتوۆ ليسسابون (پورتۋگاليا) چەللەندجەر ءتۋرنيرىن جەڭىسپەن باستادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
وتكەن اپتادا پورتۋگاليادا براگا جارىسىنىڭ جارتىلاي فينالىنا دەيىن جەتكەن ت.سكاتوۆ بۇل جولى باستاپقى كەزدەسۋىن دۇنيەجۇزىلىك رەيتينگتە 303-ورىندا تۇرعان يسپانيالىق وريول روكا باتاليامەن وتكىزدى.
قازاقستاندىق سپورتشى تاي-برەيكپەن اياقتالعان ەكى پارتيادا 7:6 (10:8)، 7:6 (7:5) ەسەبىمەن باسىم ءتۇستى.
ءۇش ساعاتقا جۋىق ۋاقىتقا سوزىلعان تارتىستى باسەكە بارىسىندا ت.سكاتوۆ 1 ەيس جاساپ، 4 برەيك-پوينتتىڭ ۇشەۋىن ءوز ەسەبىنە جازدى. قارسىلاسى 3 ەيس، 3 برەيكپەن (12 برەيك-پوينت) كوزگە ءتۇستى.
تيموفەي سكاتوۆ شيرەك فينالعا شىعۋ ءۇشىن الەمنىڭ 122ء-ىنشى، دودانىڭ 3-راكەتكاسى، يتاليالىق فرانچەسكو پاسسارومەن تالاسادى.
ەسكە سالا كەتەيىك، بۇدان بۇرىن الەكساندر بۋبليكتىڭ الەمدىك رەيتينگىدە توپ-40-قا جۋىقتاعانىن جازعان بولاتىنبىز.