الماتىدا «م.و. اۋەزوۆ مۇراسى جانە الەمدىك وركەنيەت» اتتى كونفەرەنسيا وتەدى

كونفەرەنسيا ماتەريالدارى ەلەكتروندى جيناق رەتىندە جارىققا شىعادى

2022 جىلدىڭ 28 قىركۇيەگىندە م.و. اۋەزوۆتىڭ دۇنيەگە كەلگەنىنە 125 جىل تولۋىنا ارنالعان «م.و. اۋەزوۆ مۇراسى جانە الەمدىك وركەنيەت» اتتى حالىقارالىق عىلىمي-پراكتيكالىق كونفەرەنسيا جانە 29 قىركۇيەكتە «مۇحتار اۋەزوۆ جانە جاڭا قازاقستان: رۋحاني مادەنيەتتىڭ قوعامدىق سانانى دامىتۋداعى ءرولى» اتتى رەسپۋبليكالىق دوڭگەلەك ۇستەل وتەدى، دەپ حابارلايدى Almaty-akshamy.kz.
 
شارانىڭ ماقساتى – ۇلى جازۋشىنىڭ الەمدىك وركەنيەت پەن ادامزات اقىل-ويىنداعى ورنى مەن ءرولىن ايقىنداۋ، قازاق جانە الەم ادەبيەتىنىڭ ادەبي بايلانىسىن نىعايتۋ، قازاق ادەبيەتىنىڭ دامۋ ۇردىستەرىنىڭ تاريح جانە بۇگىنىن سارالاۋ، قالامگەر مۇراسىنداعى الاش پاراديگماسى، جالپى ادامزاتتىق قۇندىلىقتارعا نەگىزدەلگەن وزىق يدەالارىن وسكەلەڭ ۇرپاقتىڭ بويىنا ءسىڭىرۋ. 

ۇلى جازۋشىنى ەسكە الۋ شاراسى م.و. اۋەزوۆ قابىرىنە قۇران وقىپ، ەسكەرتكىشىنە گۇل شوقتارىن قويۋ راسىمىمەن باستالىپ، «دوستىق ءۇيى» ءماجىلىس زالىندا وتەتىن كونفەرەنسيامەن جالعاسادى.

كونفەرەنسياعا رەسەي، وزبەكستان، قىرعىز رەسپۋبليكاسى، ازەربايجان، رەسەي، ماجارستان، نيدەرلاندى جانە باسقا ەلدەردىڭ جەتەكشى عالىمدارى، وتاندىق عىلىم ساڭلاقتارى مەن ينستيتۋتىمىزدىڭ عىلىمي قىزمەتكەرلەرى، وقىتۋشىلار مەن جاس عالىمدار قاتىسادى.

كونفەرەنسيا ماتەريالدارى ەلەكتروندى جيناق رەتىندە جارىققا شىعادى. 

شارانى ۇيىمداستىرۋشىلارى: قازاقستان رەسپۋبليكاسى عىلىم جانە جوعارى ءبىلىم مينيسترلىگى عىلىم كوميتەتىنىڭ م.و. اۋەزوۆ اتىنداعى ادەبيەت جانە ونەر ينستيتۋتى، تÜRKSOY حالىقارالىق ۇيىمى، حالىقارالىق تۇركى اكادەمياسى، قازاقستان جازۋشىلار وداعى، الماتى ق. اكىمدىگى.

«م.و. اۋەزوۆ مۇراسى جانە الەمدىك وركەنيەت» اتتى حالىقارالىق عىلىمي-پراكتيكالىق كونفەرەنسياسى «دوستىق ءۇيى» ءماجىلىس زالىندا (الماتى ق.، قۇرمانعازى ك-سى، 40) وتەدى.