سارىباي بي اۋىلى – الماتى وبلىسىنداعى جامبىل اۋدانىنا قاراستى ەلدىمەكەننىڭ ءبىرى
گاز قۇبىرىن جۇرگىزۋدىڭ ءوزى 1 ميلليون تەڭگەگە جۋىقتادى. وسىلاي دەپ نالىعان كوپبالالى وتباسى جىلۋعا ءزارۋ، دەپ حابارلايدى Almaty-akshamy.kz Almaty.tv-گە سىلتەمە جاساپ.
كامەلەتكە تولماعان 4 بالانىڭ اناسىنىڭ ايتۋىنشا، كوگىلدىر وتىنعا قوسىلۋ ءۇشىن مەردىگەرلەر اسپانداعى باعانى سۇرايدى.
ءۇيدى 7 جىلدان بەرى كومىر جاعىپ جىلىتىپ كەلگەن كوپبالالى وتباسى وتاعاسىنان ايىرىلعالى كوگىلدىر وتىنعا ءزارۋ. ال گاز قۇبىرىن وتكىزەتىن مەردىگەرلەر ءتۇرلى سەبەپتەردى ايتىپ، جالعىزباستى انانىڭ شاشى جەتپەيتىن قۇنىن سۇراعان. سودان بەرى ءۇشىنشى اي 34 جاستاعى كەلىنشەك مەكەمەنىڭ تابالدىرىعىن توزدىرۋمەن كەلەدى.
«ميلليون بولىپ تۇر. 975 مىڭ تەڭگە بولدى. 385 مىڭ گازعا، 390 مىڭ قۇبىر تارتقانعا، 200 مىڭ تەز كىرگىزگەنگە. كالكۋلياتورمەن ەسەپتەپ تۇرىپ شىعارىپ بەردى. مەن 385 مىڭىن تولەيىن دەسەم، كەلىسپەدى. 100 مەترگە ۇستىنەن قوسىمشا تولەۋ كەرەگىن ايتتى»، – دەدى جالعىزباستى انا گۇلسايا تانەكەيەۆا.
وتاعاسىنىڭ قازاسىنان كەيىن ونسىز دا تۇرمىستىق جاعدايى تومەندەگەن بۇل وتباسىنا باعا قىمبات. سەبەبى گۇلسايانىڭ ايلىعى شايلىعىنان اسپايدى. ال ۇكىمەتتەن بەرەتىن جاردەماقى بالالاردىڭ مەكتەپ كيىمىنەن، كەرەك-جاراعىنان ارتىلمايدى ەكەن.
«390 مىڭدى تولەي السام، گاز قاشان كىرەدى دەپ سۇرادىم. «جوق. ۇستىنەن تاعى 200 مىڭ قوس» دەيدى. تەز كىرگىزۋ ءۇشىن. سوندا جۇمىسىنا سۇراپ تۇر عوي. مەنىڭ ونداي اقشام جوق»، – دەدى جالعىزباستى انا گۇلسايا تانەكەيەۆا.
الايدا مەردىگەرلەردىڭ ءوزى مۇنى جوققا شىعاردى. ودان بولەك، بۇل وتباسىنا كومەك رەتىندە جەڭىلدىكتەر جاساۋ ماسەلەسىن قاراستىراتىندارىن ايتتى. ال بۇعان دەيىن نە سەبەپتى ماردىمدى جاۋاپ بەرىلمەي كەلگەنىن ۇلكەن باسشىسىنىڭ ءىسساپاردا جۇرۋىمەن بايلانىستىردى.
«3-4 كۇن ىشىندە باسشىمىز كەلەدى. سول كىسىمەن اقىلداسىپ، ءوزىن دە شاقىرىپ جەڭىلدىك پەن كومەك بەرەمىز. ءبىز ەندى بۇل اۋداندا 2009 جىلدان بەرى جۇمىس ىستەيمىز. تالاي جاعدايى جوق وتباسىنا، مۇگەدەكتەرگە جەڭىلدىك بەردىك»، – دەدى «تاۋەكەل-گاز قۇبىرى» ج ش س ديرەكتورى قازبەك عابيدەن.
ايتا كەتسەك، كوپبالالى وتباسى تۇرىپ جاتقان سارىباي بي اۋىلى – الماتى وبلىسىنداعى جامبىل اۋدانىنا قاراستى ەلدىمەكەننىڭ ءبىرى. جەرگىلىكتى اكىمدىك دەرەگىنشە، مۇنداعى 816 شاڭىراق بار. 510 ءۇي كوگىلدىر وتىنعا قوسىلعان. ال جالعىزباستى انا ءتۇتىنىن تۇتەتىپ وتىرعان شاڭىراققا قاشان جىلۋ قاشان كىرەرى ازىرگە بەلگىسىز.