الەكساندر نەدوۆەسوۆ بيىلعى ماۋسىمدا جەتىنشى تيتۋلعا قول جەتكىزدى
قازاقستاندىق الەكساندر نەدوۆەسوۆ جۇپتىق سىندا كييەۆ چەللەندجەر ءتۋرنيرىنىڭ جەڭىمپازى اتاندى، دەپ حابارلايدى Almaty-akshamy.kz ۇلتتىق وليمپيادا كوميتەتىنە سىلتەمە جاساپ.
قازاقستاندىق تەننيسشى برازيليالىق ورلاندو لۋجبەن بىرگە فينالدا ۋكراينالىقتار دەنيس مولچانوۆ - سەرگەي ستاحوۆسكييمەن سايىستى. قازاقستاندىق-برازيليالىق جۇپ 6:4، 6:4 ەسەبىمەن جەڭىسكە جەتتى. ولار ءبىر ساعاتتان استام ۋاقىتقا سوزىلعان ماچتا 3 ەيس جاساپ، 11 برەيك-پوينتتىڭ ۇشەۋىن پايدالانا ءبىلدى. قارسىلاستارى 1 ەيس، 1 برەيكپەن (9 برەيك-پوينت) شەكتەلدى. وسىلايشا ا.نەدوۆەسوۆ جۇپتىق سىندا ءوز سپورتتىق جولىنداعى 22ء-ىنشى، بيىلعى ماۋسىمداعى جەتىنشى تيتۋلىنا قول جەتكىزدى.