قازاقستاندىق تەننيسشى اقش-تاعى ءتۋرنيردىڭ جارتىلاي فينالىنا شىقتى

تاعى ءبىر قازاقستاندىق ميحايل كۋكۋشكين ىرىكتەۋ سايىستارىنىڭ فينالىنا شىعا المادى

قازاقستاننىڭ جۇپتىق سىنداعى ءبىرىنشى، الەمنىڭ 20-راكەتكاسى اننا دانيلينا سەربيالىق الەكساندرا كرۋنيچپەن بىرگە كليۆلەند (اقش) WTA 250 ءتۋرنيرىنىڭ جارتىلاي فينالىنا شىقتى، دەپ حابارلايدى Almaty-akshamy.kz قازاقپاراتقا سىلتەمە جاساپ.

جارىستىڭ 4-راكەتكالارى بولىپ تىركەلگەن ا.دانيلينا مەن ا.كرۋنيچ شيرەك فينالدا جاپونيالىق ميۋ كاتو – يندونەزيالىق الديلا سۋتدجياديمەن شەبەرلىك بايقاستى.

ءبىرىنشى پارتيادا قازاقستاندىق-سەربيالىق جۇپ باسىمدىلىق تانىتتى – 6:2.
ەكىنشى سەتتە جاپونيالىق-يندونەزيالىق دۋەت تاي-برەيكتە ءساتتى وينادى – 7:6 (7:4).
سۋپەر تاي-برەيكتە ا.دانيلينا مەن ا.كرۋنيچ جەڭىستى جۇلىپ الدى – 10:7.

ساعات جارىمنان استام ۋاقىتقا سوزىلعان تارتىستى باسەكەدە قازاقستاندىق-سەربيالىق جۇپ 2 ەيسپەن بىرگە 12 برەيك-پوينتتىڭ جارتىسىن ءمۇلت جىبەرمەدى.

ا. دانيلينا مەن ا. كرۋنيچ فينالعا شىعۋ ءۇشىن دودانىڭ 1-راكەتكالارى، چەحيالىقتار باربورا كرەيچيكوۆا – كاتەرينا سينياكوۆامەن تالاسادى.

تاعى ءبىر قازاقستاندىق ميحايل كۋكۋشكين اقش اشىق چەمپيوناتى ىرىكتەۋ سايىستارىنىڭ فينالىنا شىعا المادى. ول يسپانيالىق فەرناندو ۆەرداسكوعا جول بەردى – 6:7 (4:7)، 3:6. ەندى ف.ۆەرداسكو رەسەيلىك پاۆەل كوتوۆتى جەڭسە، نەگىزگى تۋرنيرگە وتەدى.

ەسكە سالا كەتەيىك، بۇدان بۇرىن دميتريي پوپكونىڭ اقش اشىق چەمپيوناتىنىڭ ىرىكتەۋ سايىسىندا جەڭىلىپ قالعانىن جازعان بولاتىنبىز.