رەسپۋبليكا شەت مەملەكەتتەرگە استىق، كومىر، مۇناي ونىمدەرىن، تىڭايتقىشتار، حيميالىق جانە باسقا دا زاتتاردى ەكسپورتتايدى.
قازاقستاندىق تەڭىز پورتتارى ارقىلى جۇك تاسىمالداۋ كولەمى ەكى ەسەگە ارتتى. ماسەلەن، ۇستىمىزدەگى جىلدىڭ ءبىرىنشى توقسانىندا اقتاۋ ايلاعى ارقىلى ءبىر ميلليون 200 مىڭ توننادان استام جۇك تاسىمالدانعان، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
پورت جىل بويى بارلىق تۇردەگى كەمەلەردى قابىلدايدى. مۇنداعى اشىق قويمالاردا 2،5 مىڭ كونتەينەر ساقتاۋعا بولادى.
"ءبىز "ترانسكاسپيي حالىقارالىق كولىك باعىتى" قاۋىمداستىعىن قۇردىق. وعان وسى پروسەسكە قاتىسۋشىلاردىڭ بارلىعى كىرەدى. ارينە، وسى باعىتتىڭ تار تۇستارىن كەڭەيتەمىز. ءبىز سيفرلاندىرۋ، كەدەندىك راسىمدەردى جەڭىلدەتۋ، جەدەلدەتىلگەن پروسەستەر ارقىلى وتكىزۋ قابىلەتىن 20 پروسەنتكە دەيىن ارتتىرا الامىز"، - دەدى اقتاۋ حالىقارالىق تەڭىز ساۋدا پورتىنىڭ پرەزيدەنتى اباي تۇرىكپەنبايەۆ.
ال قۇرىق پورتىمەن ەلىمىزگە كولىك، ازىق-تۇلىك، ونەركاسىپتىك قۇرال-جابدىقتار، قۇرىلىس ماتەريالدارى يمپورتتالادى. ترانزيتپەن ەلەكترونيكا، توقىما، مەتالل بۇيىمدارى اكەلىنەدى. مۇنداعى ينفراقۇرىلىم اۆتوموبيل جانە تەمىرجول ايلاقتارىنان تۇرادى. سوڭعىسىنىڭ قۋاتتىلىعى جىلىنا 4 ميلليون تونناعا جەتەدى. ەكى ايلاق ءبىر مەزەتتە ءتورت پارومعا قىزمەت كورسەتە الادى. جۇكتەر «ءبىر تەرەزە» قاعيداتى بويىنشا وڭدەلەدى.
سەرىك احمەتوۆ، قۇرىق پورتىنىڭ باس ديرەكتورى:
– وتكەن ايدا تاسىمال كولەمىن ءۇش ەسەگە ارتتىردىق. بۇل اۆتوكولىك پەن ۆاگون سانى ءۇش ەسە كوپ دەگەن ءسوز، ناتيجەسىندە ءۇش ەسە كوپ جۇك وڭدەلدى. تۇركيانىڭ بۇكىل لوگيستيكاسى اۆتوكولىكتەرگە نەگىزدەلگەن. سوندىقتان ءبىز دە ەۋروفۋرالارعا ارناپ ءدالىز قۇرۋعا نازار اۋداردىق.
كوپتەگەن حالىقارالىق دالىزدەردىڭ تاعى ءبىر قۇرامداس بولىگى كاسپيي تەڭىزىنىڭ شىعىس جاعالاۋىندا ورنالاسقان. اقتاۋ سولتۇستىك تەرمينالىنان جۇكتەر نەگىزىنەن يران، رەسەي جانە ءازىربايجان باعىتتارىنا جونەلتىلەدى.