ەnergyprom.kz مالىمەتىنشە، قازاقستاندا 300 مىڭنان استام ستۋدەنت تۋعان قالاسىنان جىراقتا ءبىلىم الىپ جاتىر، دەپ حابارلايدى aqshamnews.kz
الايدا ولاردىڭ بارلىعىنا جاتاقحانادان ورىن تابىلا بەرمەيدى. ءار ءۇشىنشى ستۋدەنتكە جاتاقحانا قاجەت، ءبىراق ولاردىڭ تەك ۇشتەن ەكىسى عانا جاتاقحانا الادى.
سۇرانىس پەن ۇسىنىس
2025 جىلدىڭ باسىنداعى دەرەكتەرگە سايكەس، ەل بويىنشا 131،4 مىڭ ستۋدەنت جاتاقحاناعا مۇقتاج. ءبىراق سونىڭ تەك 95،9 مىڭى عانا جاتاقحانادان ورىن الادى. بۇل جالپى قاجەتتىلىكتىڭ شامامەن 73 پايىزى. قالعان ستۋدەنتتەر پاتەر جالداپ تۇرۋعا ءماجبۇر.
الايدا بۇل كورسەتكىش بارلىق وڭىردە بىردەي ەمەس. كەيبىر وبلىستاردا جاتاقحانا تاپشىلىعى وتە جوعارى. مىسالى، ەل بويىنشا ەڭ كوپ ستۋدەنت الماتى – 123،5 مىڭ، استانا – 51،9 مىڭ جانە شىمكەنت – 28،5 مىڭ قالالارىندا وقيدى. الماتى مەن استانادا ءاربىر ەكىنشى ستۋدەنت جاتاقحاناعا مۇقتاج. بۇل قالالاردا سۇرانىس وتە جوعارى.
ەڭ قيىن جاعداي اقتوبە وبلىسىندا. مۇندا جاتاقحاناعا مۇقتاج ستۋدەنتتەردىڭ ۇلەسى 70 پايىزعا جۋىق، ءبىراق ولاردىڭ تەك جارتىسى عانا (50،4%) جاتاقحانادان ورىن الادى. سولتۇستىك قازاقستان (68،8%)، تۇركىستان (58،5%) ، اباي وبلىستارىندا (55،4%).
ستۋدەنتتەرگە ارنالماعان جاتاقحانالار
2025 جىلدىڭ قاڭتار–ماۋسىم ايلارى ارالىعىندا ەل بويىنشا 22 جاڭا جاتاقحانا پايدالانۋعا بەرىلگەن. ءبىراق ولاردىڭ تەك التاۋى عانا ناقتى ستۋدەنتتەرگە ارنالعان. تاعى 4 جاتاقحانا – وتباسىلىق ۇلگىدەگى، ال قالعاندارى – جۇمىسشىلار مەن ميگرانتتارعا ارنالعان عيماراتتار.
جاڭا جاتاقحانالار سالىنعان وڭىرلەر:
اتىراۋ وبلىسى – 6
استانا قالاسى – 4
اقمولا جانە ماڭعىستاۋ وبلىستارى – ءارقايسىسىندا 3 جاتاقحانادان
الايدا سۇرانىسى ەڭ جوعارى وڭىرلەر – الماتى مەن اقتوبە وبلىستارىندا بيىل بىردە-بىر ستۋدەنتتىك جاتاقحانا سالىنباعان. اباي جانە قىزىلوردا وبلىستارى بويىنشا ناقتى مالىمەتتەر جوق.
ستۋدەنتتەر سانى ارتىپ كەلەدى
2025 جىلدىڭ ءبىرىنشى توقسانىندا باسقا ايماقتاردان 8،9 مىڭ ستۋدەنت كەلگەن. بۇل وتكەن جىلمەن سالىستىرعاندا 25 پايىزعا كوپ. ەڭ كوپ ءوسىم الماتى قالاسىندا – 2،1 مىڭ ستۋدەنت. ودان كەيىن استانا، شىمكەنت، الماتى جانە تۇركىستان وبلىستارى ورنالاسقان. پاۆلوداردا ستۋدەنت سانى وزگەرىسسىز قالسا، ۇلىتاۋ مەن اقمولا وبلىستارىندا ازايعان.