بۇدان بۇرىن بەيجىڭ ۇلتتىق ستاديونىندا قىسقى وليمپيادا ويىندارىنىڭ اشىلۋ سالتاناتى وتكەنىن حابارلاعانبىز.
قۇرامانىڭ وليمپيادالىق ەكيپيروۆكاسىن دايىنداۋعا ءبىر جىلدان اسا ۋاقىت كەتتى، دەپ حابارلايدى Almaty-akshamy.kz
قازاقستاننىڭ مەملەكەتتىك تۋىمەن شىققان قازاقستاندىق سپورتشىلاردىڭ كيگەن كيىمى جۇڭگو حالقىنىڭ نازارىن اۋداردى.
تۋ ۇستاۋشى رەتىندە قازاقتىڭ مادەني ەلەمەنتتەرىنە باي كيىم كيگەن قوس قازاقستاندىق سپورتشىنى قىتايلىق جەلى قولدانۋشىلارى weibo ۆەبسايتىندا (قىتايدىڭ Twitter جانە Facebook-كە ەلىكتەپ جاساعان الەۋمەتتىك جەلىسى-رەد.) كوپتەپ قوشەمەتتەپ جاتتى.
كوپتەگەن قىتايلىقتار قىسقى وليمپيادا ويىندارىنداعى قازاقتىڭ تۋ ۇستاۋشى كيىمىن وتكەن جىلى توكيو وليمپياداسى كەزىندەگى قازاقتىڭ تۋ ۇستاۋشىسىنىڭ كيىمىمەن سالىستىرىپ، «قازاقستان كيىم ديزاينى جاعىنان كوپتەگەن ەلدەردەن الدەقايدا جاقسى ەكەن» دەيدى.
جەلىدە تاعى ءبىر جۇڭگو ازاماتى «مەنىڭ اناما قازاق سپورتشىلارىنىڭ كيىمدەرى قاتتى ۇنايدى. مەن دە ءدال سول كيىمدى العىم كەلەدى» دەپ جازدى. ايتا كەتەرلىگى، وليمپيادا كومانداسىنا ارنالعان سپورت فورماسىن قازاقستاندىق ZIBROO كومپانياسى شىعاردى.
شەرۋگە ارنالعان كوللەكسيانى رەسەيلىك ديزاينەر، SHISHKIN برەندىنىڭ نەگىزىن قالاۋشى دميتريي شيشكين دايىنداعان. قازاقستان قۇراماسىنىڭ وليمپيادالىق ەكيپيروۆكاسىن دايىنداۋعا ءبىر جىلدان اسا ۋاقىت كەتتى. كيىمدى دايىنداۋ پروسەسىنە اتلەتتەردىڭ وزدەرى قاتىستى. ولار فورمانىڭ ديزاينى، ساپاسى مەن فۋنكسيونالىنا قاتىستى ءوز ۇسىنىستارىن بىلدىرگەن.