ماقسات – قالا ەكونوميكاسىنىن وركەندەتۋ مەن وتاندىق ءوندىرىس وشاقتارىن كوبەيتۋ.
الماتىدا شاعىن جانە ورتا بيزنەس سۋبەكتىلەرىن جەڭىلدىكپەن نەسيەلەۋ مەن قايتارىمسىز گرانت بەرۋ بيىل دا جالعاسادى، دەپ حابارلايدى Almaty-akshamy.kz الماتى ارناسىنا سىلتەمە جاساپ.
باعدارلاماعا ءتۇرلى ساناتتاعى ازاماتتاردىڭ قاتىسۋىنا بولادى. كاسىپ باستايمىن دەگەن جاندار ءۇشىن مەملەكەتتەن قولداۋ كوپ.
ماسەلەن، وتكەن جىلى مەگاپوليستەگى كاسىپكەرلىكتى دامىتۋعا 18،6 ملرد تەڭگە قارجى بولىنگەن. سونىڭ ناتيجەسىندە 5 مىڭنان استام ادام جەڭىلدەتىلگەن نەسيە الىپ، جۇمىسىن باستادى. جوبانى قارجىلاندىراتىن باسىم باعىت – كولىك قۇرىلعىلارىن شىعارۋ، ساۋدا جانە ونەركاسىپ، سونداي-اق قىزمەت كورسەتۋ سالاسى.
«جىل سايىن رەسپۋبليكالىق بيۋدجەتتەن بولىنەتىن قارجى كولەمى ۇلعايىپ كەلەدى. سايكەسىنشە، مەملەكەتتىك باعدارلاماعا قىزىعۋشىلىق تانىتاتىندار دا كوپ. ءقازىر «بيزنەستىڭ جول كارتاسى-2025» مەملەكەتتىك باعدارلامالار اياسىندا «الماتى بيزنەس-2025» جانە «الماتى بيزنەس» جوبالارى جۇمىس ىستەپ تۇر. بۇل باعىتپەن كاسىپكەرلەر 2 ملن تەڭگەدەن 5 ملن تەڭگەگە دەيىن قايتارىمسىز گرانت الا الادى»، - دەدى كاسىپكەرلىك جانە ينۆەستيسيالار باسقارماسىنىڭ ءبولىم باسشىسى ءادىل جانكين.
قوماقتى اقشا كەز كەلگەن جانعا بەرىلە بەرمەيدى. وعان قول جەتكىزۋ ءۇشىن ارنايى بيزنەس جوسپارىڭىز يننوۆاسيالىق باعىتتا بولۋى كەرەك. كوميسسيا مۇشەلەرى كرەاتيۆتى يدەيالارعا تولى جوبالارعا كوڭىل بولەدى.
«كاسىبىن باستايمىن دەگەن جاندار «Qolday» پلاتفورماسى ارقىلى ءوتىنىش قالدىرا الادى. قاجەتتى قۇجاتتار ءتىزىمى: بيزنەس جوسپارى، مەملەكەتتەن كومەك الاتىن مۇمكىندىگى شەكتەۋلى جاندار بولسا، سونى راستايتىن قۇجات وتكىزۋى كەرەك. بيىلعى جوباعا ءوتىنىم بەرۋ الداعى ناۋرىز ايىندا باستالادى. سول ۋاقىتقا دەيىن تۇرعىندار بيزنەس جوسپارلارىن دايىنداپ، مامانداردان كومەك الۋىنا بولادى»، - دەدى «Qolday» كاسىپكەرلىك ورتالىعى ديرەكتورىنىڭ ورىنباسارى اسەم ماقاشيەۆا.
مەملەكەتتەن قارجى الىپ، كاسىبىن دوڭگەلەتەمىن دەيتىندەر «ينۆەست قولداۋعا» بارىپ، مامانداردىڭ كەڭەسىنە جۇگىنە الادى. ورتالىق شاھارداعى بايزاقوۆ، 303 مەكەنجايىندا ورنالاسقان. باعدارلاماعا تەك جۇمىسسىز ازاماتتار عانا ەمەس، تۇراقتى جۇمىس ورنى بار ادامداردىڭ دا قاتىسۋىنا دا مۇمكىندىك بار.