40 ملرد تەڭگە سۋبسيديا ءىس جۇزىندە دالاعا كەتكەن.
سىبايلاس جەمقورلىققا قارسى قىزمەت بۇگىنگى كۇنى اۋىل شارۋاشىلىعىن دامىتۋعا بولىنگەن سۋبسيديالاردى جىمقىرۋ فاكتىلەرى بويىنشا 109 سوتقا دەيىنگى تەرگەۋدى اشتى، دەپ حابارلايدى Almaty-akshamy.kz Eldala.kz سىلتەمە جاساپ.
مامانداردىڭ ايتۋىنشا، 73 ادام كۇدىكتى دەپ تانىلدى، ونىڭ 37 لاۋازىمدى جانە ولارعا تەڭەستىرىلگەن ادامدار بولىپ تابىلادى. بۇل تۋرالى سىبايلاس جەمقورلىققا قارسى ءىس-قيمىل اگەنتتىگىنىڭ باسپا ءسوز قىزمەتى حابارلاپ وتىر.
ۆەدومستۆونىڭ مالىمەتىنشە، اتالعان ىستەر بويىنشا ءتۇرلى دەڭگەيدەگى 23 باسشى ءوتىپ جاتىر. ولاردىڭ قاتارىندا اشم مال شارۋاشىلىعى دەپارتامەنتى باسشىسىنىڭ مىندەتىن اتقارۋشى، وبلىستىق اۋىل شارۋاشىلىعى باسقارمالارىنىڭ ءتورت باسشىسى جانە ولاردىڭ ءتورت ورىنباسارى، اۋداندىق اۋىل شارۋاشىلىعى بولىمدەرىنىڭ باسشىلارى مەن ولاردىڭ ورىنباسارلارى، وبلىستىق اۋماقتىق ينسپەكسيا مەن اۋداندىق ۆەتەرينارلىق قىزمەت وكىلدەرى.
«جالپى، اگەنتتىك سۋبسيديالاۋ سالاسىن تالداۋ كەزىندە قولدانعان ءتاسىل سىبايلاس جەمقورلىق سحەمالارىن انىقتاۋدا جانە جويۋدا ءوزىنىڭ تيىمدىلىگىن كورسەتتى جانە اگرارشىلاردىڭ وزدەرىنىڭ اراسىندا وڭ پىكىرگە يە بولدى. بۇل رەتتە اگەنتتىك ءتوراعاسى سۋبسيديالاۋ سالاسىنداعى زاڭنامادا اشم مەن وبلىس اكىمدىكتەرىنىڭ باسشىلىعىن قوسا العاندا، جوعارى لاۋازىمدى شەنەۋنىكتەردىڭ جاۋاپكەرشىلىگى بۇلىڭعىر ەكەنىن بىرنەشە رەت اتاپ وتكەن. وسىعان بايلانىستى ولاردىڭ قىلمىستارعا قاتىستىلىعىن انىقتاۋ قيىن. سوندىقتان اگەنتتىك ازىرلەنىپ جاتقان سۋبسيديالاۋ قاعيدالارىندا ولاردىڭ جاۋاپكەرشىلىگىن دەربەستەندىرۋ بويىنشا ۇسىنىستار ەنگىزدى»، - دەپ مالىمدەدى سىبايلاس جەمقورلىققا قارسى ءىس-قيمىل اگەنتتىگىندە.
بۇعان دەيىن اگەنتتىك اۋىل شارۋاشىلىعىن سۋبسيديالاۋ سالاسىن تالداۋ بارىسىندا جەمقورلاردىڭ قالتاسىنا قاراجات تۇسەتىن بىرنەشە تۇراقتى سحەمانى اشقان بولاتىن. ماسەلەن، پارا العان ۆەتەرينارلىق باقىلاۋ كوميتەتى قىزمەتكەرلەرىنىڭ قاتىسۋىمەن مال ەكسپورتقا موراتوريي كەزەڭىندە شەتەلگە ەكسپورتتالعان.
سونداي-اق ۇاعبو اكىمشىلەندىرەتىن اسج بازاسىنا دۇرىس ەمەس دەرەكتەردى ەنگىزۋ ارقىلى اۋىل شارۋاشىلىعى جانۋارلارىنىڭ جاسى مەن جىنىسى تۇزەتىلىپ، ەسەپتىك دەرەكتەر قايتالاندى. ناتيجەسىندە جوق مالعا سۋبسيديا بەرىلگەن نەمەسە ەكى رەت سول مالعا سۋبسيديا بەرىلگەن.
جايىلىمداردى سۋلاندىرۋ ءۇشىن كۇن پانەلدەرىن جەتكىزۋدە تاعى ءبىر سحەما قولدانىلدى. جۇمىس ىستەمەيتىن جابدىق جوعارى باعامەن ساتىپ الىنعان، كەيىننەن ول پايدالانىلماعان، ال 40 ملرد تەڭگە سۋبسيديا ءىس جۇزىندە دالاعا كەتكەن.