كەزدەسۋدە ءوڭىر باسشىسى قانات الدابەرگەن ۇلى باس مۇفتيگە وبلىس تۇرعىندارىنىڭ ىستىق ىقىلاسى مەن سالەمىن جەتكىزدى.
قمدب باسپا ءسوز قىزمەتىنىڭ مالىمەتىنشە، باس ءمۇفتي الماتى وبلىسىنىڭ اكىمىمەن كەزدەستى، دەپ حابارلايدى Almaty-akshamy.kz
بۇگىن قازاقستان مۇسىلماندارى ءدىني باسقارماسىنىڭ ءتوراعاسى ناۋرىزباي قاجى تاعان ۇلى الماتى وبلىسىنىڭ اكىمى قانات بوزىمبايەۆپەن كەزدەستى.
«الەمدە ءدىني الاۋىزدىق ورشىگەن قازىرگىدەي كۇردەلى كەزەڭدە ەل ىشىندە جۇرگىزىلەتىن اعارتۋشىلىق جۇمىستاردىڭ مازمۇنى جانە ساپاسى ۇنەمى نازاردا بولۋى كەرەك. جاستارىمىزدى يماندىلىققا، ادامگەرشىلىككە شاقىرىپ، ولارعا ءبىلىم مەن عىلىمعا قۇشتارلىق، وتانعا دەگەن سۇيىسپەنشىلىك قاسيەتتەرىن دارىپتەۋىمىز قاجەت. يمامدار مەن ءدىن قىزمەتشىلەرى وسى جاۋاپتى مىندەتتى ويداعىداي اتقاراتىنىنا سەنەمىن»، - دەدى وبلىس اكىمى.
باس ءمۇفتي ناۋرىزباي قاجى تاعان ۇلى ءوز سوزىندە قاڭتار قاسىرەتى بارشامىزعا قوعامداعى تىنىشتىق بارىنەن دە بيىك قۇندىلىق ەكەنىن سەزىندىرگەنىن اتاپ ءوتتى.
«ءبىزدىڭ قوعام الدىنداعى باستى مىندەتىمىز – مۇسىلمان قاۋىمىنىڭ بىرلىگىن نىعايتۋ، بۇلىك پەن جالعان ءدىني ۇراندارعا جول بەرمەۋ. وسى باعىتتا جىل باسىندا بيىلعى 2022 جىلدى «يسلام – ىنتىماق پەن بىرلىك ءدىنى» جىلى دەپ جاريالادىق. وسى اتاۋلى جىل اياسىندا كوپتەگەن يگى شارالار وتكىزۋدى جوسپارلاپ وتىرمىز. اللا قالاسا، بۇگىنگى تالدىقورعاننىڭ تورىندە وتكەلى جاتقان «يسلام – ىنتىماق پەن بىرلىك ءدىنى» رەسپۋبليكالىق كونفەرەنسياسى وسى باستامامىزعا سەرپىن بەرەدى دەگەن ويدامىز. اللا جيىنىمىزدى بەرەكەلى ەتكەي!» - دەدى قمدب ءتوراعاسى.
باسقوسۋ سوڭىندا تاراپتار ءدىن مەن ءداستۇر ساباقتاستىعى، اسىل ءدىنىمىزدىڭ بەدەلىن بيىكتەتۋ باعىتىندا ءبىرقاتار بىرلەسكەن يگى جوبالاردى جۇزەگە اسىرۋعا كەلىستى.