قۇتقارۋشىلار گازيانتەپ قالاسىندا تاۋلىك بويى ەكى اۋىسىمدا ەكى ۋچاسكەدە جۇمىس ىستەپ جاتىر
تۇركيادا ءزىلزالادان كەيىن ىزدەۋ-قۇتقارۋ جۇمىستارى جۇرگىزىلە باستاعان كۇننەن باستاپ قازاقستان تجم قۇتقارۋشىلارى 7 ادامدى تىرىدەي قۇتقارىپ، مەديسينا قىزمەتكەرلەرىنە تاپسىردى. ءۇيىندى استىنان ءولى كۇيىندە تابىلىپ، جەر بەتىنە شىعارىلعان 85 ادامنىڭ 10-ى بالا، دەپ حابارلايدى Almaty-akshamy.kz.
قازىرگى ۋاقىتتا قازاقستان تجم قۇتقارۋشىلارى ەكى ەلدى مەكەندە ىزدەۋ-قۇتقارۋ جۇمىستارىن جالعاستىرۋدا.
"قيراعان ۇيلەردىڭ ورنىنداعى ۇيىندىلەردىڭ اراسىن اشۋ جۇمىستارى جۇرگىزىلۋدە. قۇتقارۋشىلار تۇراقسىز قۇرىلىمداردى بولشەكتەۋ جانە ارنايى كەسكىشتىڭ كومەگىمەن جول تازارتۋ جانە قيراندىلاردىڭ استىنان زارداپ شەككەندەردى ىزدەۋدى جەڭىلدەتۋ ءۇشىن ۇيىندىلەردىڭ استىنداعى ارماتۋرانى كەسۋ جۇمىستارى جۇرگىزۋدە. بۇل بەتون، ارقالىقتار جانە باسقا دا قۇرىلىس قالدىقتارىن بولشەكتەپ، ارنايى تەحنيكاعا جۇكتەۋدى جەڭىلدەتۋ ءۇشىن جاسالادى"، - دەلىنگەن حابارلامادا.
ءبىرىنشى ەشەلونمەن بارعان قۇتقارۋشىلار گازيانتەپ قالاسىندا تاۋلىك بويى ەكى اۋىسىمدا ەكى ۋچاسكەدە جۇمىس ىستەپ جاتىر. قازاقستانن تجم ەكىنشى ەشەلونمەن بارعان قۇتقارۋشىلار تۇركياعا كەلگەن ساتتەن باستاپ نۋرداگى قالاسىندا ىزدەۋ-قۇتقارۋ جۇمىستارىن تاۋلىك بويى جۇرگىزۋدە.