پرەزيدەنت جىلىجاي تەحنولوگيالارىنىڭ دامۋىمەن تانىستى

كومپانيانىڭ ونىمدەرى تولىعىمەن قازاقستاننىڭ ىشكى نارىعىندا ساتىلادى

مەملەكەت باسشىسى قاسىم-جومارت توقايەۆ اقمولا وبلىسىنا جۇمىس ساپارى اياسىندا ستەپنوگورسك قالاسىنداعى «قازاقستاننىڭ جىلىجاي تەحنولوگيالارى» جشس-نە باردى، دەپ حابارلايدى Almaty-akshamy.kz اقوردانىڭ رەسمي سايتىنا سىلتەمە جاساپ.

پرەزيدەنتكە جىلىجاي ونىمدەرى – قيار، قىزاناق، بۇرىش جانە باسقا دا كوكونىستەر مەن گۇل ءوسىرۋدىڭ زاماناۋي تەحنولوگيالارى تانىستىرىلدى.

جىلىجاي كەشەنىنىڭ جالپى اۋدانى – 5 گەكتار. جوباعا سالىنعان ينۆەستيسيانىڭ جالپى كولەمى 4،8 ميلليارد تەڭگەنى قۇرايدى. 2023 جىلى باكلاجان جانە قۇلپىناي ءوسىرۋ بولىمشەلەرىن ىسكە قوسۋ جوسپارلانىپ وتىر. كومپانيانىڭ ونىمدەرى تولىعىمەن قازاقستاننىڭ ىشكى نارىعىندا ساتىلادى.

ءوڭىر – اۋىل شارۋاشىلىعى سالاسىنداعى كوشباسشىلاردىڭ ءبىرى. مۇندا ەل بويىنشا ءداندى داقىلداردىڭ تورتتەن ءبىرى وسىرىلەدى جانە ۇلكەن كولەمدە كوكونىستەر مەن قۇس ەتى وندىرىلەدى.

پرەزيدەنت وندىرىلەتىن ءونىمنىڭ ساپاسىن باعالاپ، ونىڭ سۇرانىسقا يە ەكەنىن اتاپ ءوتتى. سونداي-اق كومپانيانىڭ ەكسپورتتىق مۇمكىندىكتەرىنە نازار اۋداردى.

مەملەكەت باسشىسى اقمولا وبلىسىنىڭ اۋىل شارۋاشىلىعى تاۋارىن وندىرۋشىلەرىمەن اڭگىمەلەستى. كەزدەسۋ بارىسىندا تۇيتكىلدى ماسەلەلەر كوتەرىلىپ، وتاندىق اگروونەركاسىپ كەشەنىن دامىتۋعا قاتىستى كونسترۋكتيۆتى ۇسىنىستار ايتىلدى.

پرەزيدەنت جاعدايدى ءجىتى قاداعالايتىنىن، بيزنەس احۋالى تۋرالى جەدەل اقپارات الاتىنىن اتاپ ءوتتى. سونداي-اق مەملەكەت وتاندىق كاسىپكەرلەردى قولداۋدى جالعاستىراتىنىن جانە ىنتىماقتاستىقتىڭ جاڭا فورمالارى ازىرلەنەتىنىن مالىمدەدى.