توقسان سايىن ءبىلىم بەرۋ وبەكتىلەرىندەگى قاۋىپسىزدىكتىڭ جاي-كۇيىنە مونيتورينگ جۇرگىزىلەدى
بالالاردىڭ قۇقىعىن قورعاۋ كوميتەتىنىڭ ءتوراعاسى ناسىمجان وسپانوۆا پەتروپاۆل مەكتەبىندە بولعان شابۋىلدى تەكسەرۋ ناتيجەسىندە انىقتالعان الدىن الا دەرەكتەردى جاريالادى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«بۇل - ءبىلىم بەرۋ ۇيىمدارىنداعى نۇسقاۋلىقتاردىڭ تولىق ساقتالماۋى، ليسەنزياسى بار كۇزەتتىڭ جوقتى، تۋرنيكەتتەردىڭ بولماۋى مەن مەكتەپتىڭ ىشىنە كىرگىزۋ رەجيمى بويىنشا تالاپتاردىڭ ساقتالماۋىنان. وتكىزۋ رەجيمىنە جاۋاپتى قىزمەتكەرلەر ءبىلىم بەرۋ ۇيىمدارىنا اكەلۋگە تىيىم سالىنعان زاتتاردى انىقتاۋ بويىنشا جەتكىلىكتى قۇزىرەتتەرگە يە بولماعان. سونداي-اق، ءبىلىم بەرۋ جانە دەنساۋلىق ساقتاۋ ۇيىمدارى اراسىندا سەكتورلىق ءوزارا ءىس-قيمىلدىڭ جوقتىعى بەلگىلى»، - دەدى بالالاردىڭ قۇقىعىن قورعاۋ كوميتەتىنىڭ باسشىسى وقۋ-اعارتۋ مينيسترلىگىنىڭ شۇعىل كەڭەسىندە.
ناسىمجان وسپانوۆا ۆەدومستۆو بۇل جاعداي بويىنشا وبلىسقا ادىستەمەلىك جانە پسيحولوگيالىق كومەك كورسەتۋدى جالعاستىراتىنىن اتاپ ءوتتى.
«بالالاردىڭ قۇقىعىن قورعاۋ كوميتەتى مەملەكەت باسشىسىنىڭ تاپسىرماسىنا سايكەس، توقسان سايىن ءبىلىم بەرۋ وبەكتىلەرىندەگى قاۋىپسىزدىكتىڭ جاي-كۇيىنە مونيتورينگ جۇرگىزەدى. بۇدان باسقا ءمينيستردىڭ تاپسىرماسى بار. كەلەسى اپتادان باستاپ 1 اي بويى بالا قۇقىقتارى جونىندەگى وڭىرلىك ۋاكىلدەردىڭ، ساراپشىلاردىڭ، ۇكىمەتتىك ەمەس ۇيىمداردىڭ قاتىسۋىمەن ءبىز بارلىق ەل بويىنشا ءبىلىم بەرۋ ۇيىمدارىندا قاۋىپسىزدىكتى ۇيىمداستىرۋ ماسەلەلەرى بويىنشا تەكسەرۋ جۇرگىزەمىز»، - دەپ تۇيىندەدى ناسىمجان وسپانوۆا.
ەسكە سالساق، كەشە پەتروپاۆلدا 9 سىنىپ وقۋشىسى مەكتەپكە بالتا مەن پىشاق الا كەلىپ، 3 وقۋشىنى جاراقاتتادى. كەيىن زارداپ شەككەن ەكى بالاعا وتا جاسالدى.
بۇل وقيعاعا قاتىستى تۇسىنىكتەمە بەرگەن پرەمەر-مينيستردىڭ ورىنباسارى التاي كولگىنوۆ اتالعان مەكتەپتە ليسەنزياسى بار كۇزەت قىزمەتى بولماعانىن ءمالىم ەتتى.