راتباي مىرزاقۇلوۆ – 400-دەن استام عىلىمي جۇمىستاردىڭ اۆتورى.
فيزيكا-ماتەماتيكا عىلىمدارىنىڭ دوكتورى راتباي مىرزاقۇلوۆ «الەمدەگى ەڭ بەدەلدى عالىمداردىڭ 2%» رەيتينگىنە ەندى، دەپ حابارلايدى Almaty-akshamy.kz
جىل سايىنعى رەيتينگتى ستەنفورد ۋنيۆەرسيتەتىنىڭ ساراپشىلارى 2022 جىلعى 3 قاراشادا جاريالانعان Elsevier عىلىمي باسپاسىنىڭ سوڭعى مالىمەتتەرىنە سايكەس قۇراستىرعان.
ستەنفورد ۋنيۆەرسيتەتىنىڭ زەرتتەۋشىلەرى بيبليومەتريالىق زەرتتەۋ نەگىزىندە جىل سايىن الەمدەگى ەڭ ۇزدىك عالىمداردىڭ رەيتينگىن جاسايدى. زەرتتەۋ ەكى دەرەكقوردان تۇرادى. ءبىرىنشى رەيتينگتە ءوز مانسابىندا جۇمىستارىنا ەڭ كوپ سىلتەمە جاسالعان عالىمدار كورسەتىلسە، ال ەكىنشىسىندە سوڭعى جىلدا جۇمىستارىنا ەڭ كوپ سىلتەمە جاسالعان عالىمدار بار.
ەۇۋ پروفەسسورى راتباي مىرزاقۇلوۆ 2021 جىلى ەڭ كوپ سىلتەمە جاسالعان اۆتور جانە ءوز مانسابىندا الەمدە جۇمىستارىنا ەڭ كوپ سىلتەمە جاسالعان عالىم رەتىندە قوس تىزىمگە دە كىردى.
جۇمىستارعا سىلتەمە جاساۋ ارىپتەستەردىڭ عىلىمي جۇمىس ناتيجەلەرىنە جوعارى باعا بەرگەنىن كورسەتەدى. مەنىڭ استروفيزيكا، گراۆيتاسيا، كوسمولوگيا جانە سوليتون تەورياسىنداعى عىلىمي ەڭبەكتەرىم جوعارى دايەكسوزگە يە بولدى. بۇل جاس عالىمدار ءۇشىن جاقسى ۇلگى بولادى دەپ ويلايمىن، - دەپ اتاپ ءوتتى راتباي مىرزاقۇلوۆ.
سونداي-اق، 2021 جىلعى ۇزدىك عالىمدار رەيتينگىنە تاعى ەكى قازاقستاندىق عالىم نۇرلان ورازالين جانە سارسەنبەك مونتايەۆ ەندى.
نومينانتتار Scopus دەرەكقورىنداعى جاريالانىم بەلسەندىلىگى مەن اۆتورلاردىڭ دايەكسوزدەرىنىڭ جوعارى كورسەتكىشتەرى بويىنشا تاڭدالدى.
ەۇۋ پروفەسسورى راتباي مىرزاقۇلوۆ - ۋنيۆەرسيتەت جانىنداعى «ەۋرازيا حالىقارالىق تەوريالىق فيزيكا ورتالىعى» عىلىمي-زەرتتەۋ ينستيتۋتىنىڭ ديرەكتورى.
2022 جىلى عالىم عىلىمي جەتىستىكتەرى ءۇشىن فيزيكا جانە استرونوميا بويىنشا حالىقارالىق Scopus سىيلىعىنا يە بولدى. قازىرگى ۋاقىتتا پروفەسسور راتباي مىرزاقۇلوۆتىڭ Scopus بويىنشا حيرش يندەكسى 47-گە تەڭ.
قازاقستاننىڭ ەڭبەك سىڭىرگەن قايراتكەرى راتباي مىرزاقۇلوۆ – 400-دەن استام عىلىمي جۇمىستاردىڭ اۆتورى، 150-دەن استام ماتەريالى يمپاكت-فاكتورى جوعارى شەتەلدىك جۋرنالداردا جاريالانعان.