قازاقستاندا تەرروريزم تۋرالى جالعان حابارلامالار بويىنشا 181 قىلمىستىق ءىس قوزعالعان.
قازاقستاندا جالعان تەرروريزمدى اۋىر قىلمىستار ساناتىنا اۋىستىرۋ جوسپارلانىپ وتىر، دەپ حابارلايدى Almaty-akshamy.kz.
باس پروكۋراتۋرانىڭ مالىمەتىنشە، 2022 جىلى لاڭكەستىك ارەكەتتەر تۋرالى جالعان حابارلامالار كوبەيگەن. قىلمىستىق كودەكستىڭ 273-بابى بويىنشا 181 قىلمىستىق ءىس قوزعالعان.
«ادەتتە، اتالعان فاكتىلەردى تەكسەرۋ كوپ ۋاقىت پەن رەسۋرستاردى قاجەت ەتەدى. وقيعا ورنىنا پوليسيا، قۇتقارۋشىلار، كينولوگتار، ءورت سوندىرۋشىلەر، جەدەل جاردەم بريگادالارى، جەدەل تەرگەۋ توپتارى بارادى. كاسىپورىنداردىڭ قالىپتى جۇمىس رەجىمى بۇزىلادى. بۇل كۇش پەن قۇرالداردىڭ ايتارلىقتاي اۋىتقۋىنا اكەلەدى، تەكسەرىلەتىن كوممەرسيالىق كاسىپورىندار ميلليونداعان شىعىنعا ۇشىرايدى، تەررولىق شابۋىل تۋرالى جالعان حابارلامالار ادامداردى ەۆاكۋاسيالاۋ كەزىندە دۇربەلەڭ مەن قۇرباندىققا اكەلۋى مۇمكىن. قۇقىق قورعاۋ جانە ارنايى ورگاندار وسىنداي ءانونيمدى حابارلامالاردىڭ اۆتورلارىن انىقتاۋ بويىنشا شارالار قابىلدايدى»، - دەلىنگەن حابارلامادا.
2022 جىلى 25 ادام سوتتالعان.
مىسالى، 2022 جىلعى شىلدەدە قوستاناي وبلىسىنىڭ تۇرعىنى ءوز كورشىسىنەن كەك الۋ ماقساتىندا ەلەكتروندىق پوشتاسىن بۇزىپ، ونىڭ اتىنان استانا جانە الماتى قالالارىنىڭ 13 نىساندارىنا (ساۋدا ورتالىقتارى، اۋەجايلار، بانكتەر جانە ت.ب.) تەرروريزم اكتىسى تۋرالى كورىنەۋ جالعان حابارلاما جىبەرگەن ءۇشىن 1 جىل 6 ايعا باس بوستاندىعىنان ايىرىلعان.
الماتى وبلىسىندا قۇرداستارىمەن باستەسىپ، ەلەكتروندى پوشتا ارقىلى 3 مەكتەپتى مينالاۋ تۋرالى حابارلاما جىبەرگەن 13 جاسار بالا انىقتالىپ، پوليسياعا جەتكىزىلگەن.
باس پروكۋراتۋرا مالىمەتىنشە، قىلمىسكەرلەر تەك ەل ىشىندە عانا ەمەس، ودان تىس جەرلەردە دە ارەكەت ەتەدى.
«جەدەل ءوزارا ءىس-قيمىل ماقساتىندا شەت مەملەكەتتەرمەن ينتەرنەت-كەڭىستىكتەگى ءانونيمدى حابارلامالاردىڭ اۆتورلارىنا قاتىستى دەرەكتەر الماسۋ بويىنشا قازاقستاننىڭ باس پروكۋراتۋراسىنىڭ ۇيلەستىرۋمەن بۋداپەشت كونۆەنسياسىنا («كومپيۋتەرلىك قىلمىستار تۋرالى») قوسىلۋعا جۇمىس جۇرگىزىلۋدە. سونداي-اق، باس پروكۋراتۋرا مۇددەلى مەملەكەتتىك ورگاندارمەن بىرلەسىپ كورىنەۋ جالعان تەرروريزم بويىنشا قىلمىستىق جاۋاپتىلىقتى كۇشەيتۋ جانە قۇقىق بۇزۋشىلىقتىڭ وسى ءتۇرىن «اۋىر» ساناتىنا جاتقىزۋ (7 جىلعا دەيىن باس بوستاندىعىنان ايىرۋ مەرزىمى) تۋرالى ماسەلەنى پىسىقتاۋدا»، - دەپ تولىقتىردى.