ەركىن كۇرەستەن الەم چەمپيوناتىندا قازاقستاندىق پالۋاندار جەڭىسكە جەتتى
بىشكەكتە ەستۋ قابىلەتى زاقىمدانعان سپورتشىلار اراسىندا ەركىن كۇرەستەن الەم چەمپيوناتى ءوز مارەسىنە جەتتى. جارىس ەرەسەكتەر، جاستار جانە كادەتتەر اراسىندا ءوتتى. بايراقتى باسەكەدە قازاقستاندىق پالۋاندار قورجىنعا 6 «التىن»، 10 «كۇمىس» جانە 4 «قولا» مەدالدى سالدى، دەپ حابارلايدى Almaty-akshamy.kz.
ەرەسەكتەر اراسىندا قازاقستاندىق پالۋاندار 1 «التىن»، 4 «كۇمىس» جانە 2 «قولاعا» قول جەتكىزىپ، كوماندالىق ەسەپتە 3ء-شى ورىندى مىسە تۇتتى. سونىمەن، پەرنەش شاديار (70 كگ) التىننان القا تاقسا، بوكەيەۆ نۇرماحان (57 كگ)، جاقسىلىق دوسىمجان (65 كگ)، الدىبايەۆ شىڭعىسحان (86 كگ)، شونكۋ حايراتحاان (125 كگ) كۇمىسكە قول جەتكىزدى. ال تۇرعىنباي عاسىر (74 كگ) مەن رسالى سابىرجان (79 كگ) قولاعا قاناعات ەتتى.
جاستار اراسىندا پالۋاندارىمىز كوماندالىق ەسەپتە ءبىرىنشى ورىنعا كوتەرىلدى. بۇل ساناتتاعا پالۋانداردىڭ ەنشىسىندە 1 «التىن»، 4 «كۇمىس» جانە 2 «قولا» مەدال. سونىمەن سامارين اندەي (65 كگ) تۇعىر بيىگىنە كوتەرىلىپ، التىن مەدالدى تاقتى. ال مولداعالي نۇرحان (57 كگ)، ۋرازبايەۆ كاميل (70 كگ)، ءازي رامازان (86 كگ)، جانگابۋلوۆ يسكاندەر (74 كگ) كۇمىس مەدالدى ەنشەلەدى. امانگەلدى رايىمبەك (79 كگ) پەن بورودين كونستانتين (97 كگ) قولاعا قول جەتكىزدى.
كادەتتەر اراسىندا 4 «التىن» جانە 2 «كۇمىس» مەدالدى ەنشىلەگەن قازاقستان قۇراماسى كوماندالىق ەسەپتە 1ء-شى ورىنعا يە بولدى. اسكار دارىن (48 كگ)، كاميدەن رۋستەم (51 كگ)، سالكينبەك ەلدار (55 كگ)، مىرزاحمەت نىشانبەك (60 كگ) التىنعا قول جەتكىزىپ، ەل ءانۇرانىن ورىنداتتى. مۇنان كەيىن ماراپاتتاۋ تۇعىرىندا شولپانباي دۋلات (65 كگ) جىلقىشىباي ايقىن (71 كگ) كۇمىس مەدال تاعىپ، كوماندانىڭ ابىرويىن اسىردى.
ايتا كەتسەك، بىشكەكتە ەستۋ قابىلەتى زاقىمدانعان سپورتشىلار اراسىندا ەركىن كۇرەستەن الەم چەمپيوناتى 7-11 قىركۇيەك ارالىعىندا ءوتتى. جارىسقا 16 مەملەكەتتەن 300-دەن استام سپورتشى قاتىستى.