ولار التى مەدال جەڭىپ الدى.
ماتەماتيكادان بالقان وليمپياداسىندا قازاقستاندىق وقۋشىلار 2 كۇمىس جانە 4 قولا جەڭىپ الدى، دەپ حابارلايدى Almaty-akshamy.kz.
«شاراعا قاتىسقان وقۋشىلار ەلدىڭ ۇلتتىق قۇراماسى بىلتىردىڭ ناتيجەلەرىن جاقسارتتى. ياعني 2021 جىلعا قاراعاندا ەل قورجىنىنا ءبىر مەدال ارتىق ءتۇستى»،- دەلىنگەن ءبىلىم جانە عىلىم مينيسترلىگىنىڭ باسپا ءسوز قىزمەتىنىڭ حابارلاماسىندا.
زياتكەرلىك جارىستار 4-9 مامىر ارالىعىندا لارناكا قالاسىندا (كيپر) وفلاين فورماتتا ءوتتى.
بيىل وليمپياداعا 16 ەلدەن 100-گە جۋىق وقۋشى قاتىستى. ولاردىڭ قاتارىندا البانيا، بوسنيا جانە گەرسەگوۆينا، بولگاريا، كيپر، ماكەدونيا، گرەسيا، مولدوۆا رەسپۋبليكاسى، چەرنوگوريا رەسپۋبليكاسى، رۋمىنيا، سەربيا جانە ت.ب. بار.
«جىل سايىن سايىسقا 6 ادامنان قۇرالعان قازاقستان قۇراماسى قاتىسادى. بيىل ەل نامىسىن الماتى، نۇر-سۇلتان، قوستاناي، اتىراۋ جانە اقتاۋ قالالارىنىڭ وقۋشىلارى قورعادى. سايىستا بالالار ماتەماتيكادان وليمپيادا تاپسىرمالارىن وتە قىسقا مەرزىمدە شەشۋى كەرەك بولدى. بۇعان دەيىن بالالار جىلى اياسىندا دارىندى وقۋشىلاردى قولداۋ ماقساتىندا رەسپۋبليكا كولەمىندە ءتۇرلى دەڭگەيدەگى وليمپيادالاردى وتكىزگەن بولاتىنبىز. وليمپيادانى وتكىزۋ پروسەسى اۆتوماتتاندىرىلدى. بۇل وليمپيادالاردى اۋداندىق دەڭگەيدەن رەسپۋبليكالىق دەيگەيگە دەيىن بارىنشا اشىق جانە ترانسپارەنتتى وتكىزۋگە مۇمكىندىك بەردى. بالقان وليمپياداسى دايىندىقتىڭ ءتيىمدى ءادىسى جانە ونىڭ وقۋشىلارىمىزعا نەگىزگى حالىقارالىق ماتەماتيكالىق وليمپياداعا (IMO) دايىندالۋعا كومەكتەسەتىنىن اتاپ وتكىم كەلەدى»، - دەدى «دارىن» رەسپۋبليكالىق عىلىمي-پراكتيكالىق ورتالىعىنىڭ ديرەكتورى تيمۋر نۇركەشيەۆ.