اعىلشىن ءتىلىن دامىتۋ - ءتيىمدى باعدارلامالاردىڭ ءبىرى
ق ر وقۋ-اعارتۋ ءمينيسترى اسحات ايماعامبەتوۆ اقش-تىڭ قازاقستانداعى توتەنشە جانە وكىلەتتى ەلشىسى دەنيەل روزەنبليۋممەن كەزدەستى، دەپ حابارلايدى Almaty-akshamy.kz Zakon.kz-كە سىلتەمە جاساپ.
كەزدەسۋدە ەكى جاق قازاقستاندىق وقۋشىلاردى FLEX باعدارلاماسى بويىنشا وقىتۋ، پەداگوگتەردىڭ بىلىكتىلىگىن ارتتىرۋ جانە مۇعالىمدەرگە ارنالعان سەرتيفيكاتتار مەن كۋرستاردى تانۋ ماسەلەلەرىن تالقىلادى.
"ەلدەرىمىز اراسىندا ءبىلىم بەرۋ سالاسىنداعى ءوزارا ءتيىمدى ىنتىماقتاستىق ورناتىلىپ، ءبىلىم بەرۋدىڭ بارلىق دەڭگەيىندە بىردەن بىرنەشە جوبا ىسكە اسىرىلىپ جاتىر. ءبىز ءارتۇرلى تاجىريبە الماسۋ باعدارلامالارىن قۇپ كورەمىز، مىسالى، FLEX ارقىلى 2 000-نان استام وقۋشى اقش مەكتەپتەرىندە وقىدى. اعىلشىن ءتىلىن دامىتۋ - ءتيىمدى باعدارلامالاردىڭ ءبىرى. باعدارلاما قاتىسۋشىلارى ۇيىمدارىمىزدا اعىلشىن ءتىلىن ۇيرەتەدى. سونداي-اق STEM جانە ينكليۋزيۆتى ءبىلىم بەرۋدى دامىتۋ بويىنشا بەلسەندى جۇمىس ىستەپ جاتىرمىز. بارلىق باعىت بويىنشا الداعى ۋاقىتتا ىنتىماقتاستىعىمىز نىعايا تۇسەتىنىنە سەنەمىن"، - دەپ ايتتى وقۋ-اعارتۋ ءمينيسترى اسحات ايماعامبەتوۆ.
اقش-تىڭ قازاقستانداعى توتەنشە جانە وكىلەتتى ەلشىسى دەنيەل روزەنبليۋم ىنتىماقتاستىققا دايىن ەكەنىن ايتىپ، ەكىجاقتى بايلانىستىڭ الەۋەتىن اتاپ ءوتتى.
"ەل بولاشاعى وسكەلەڭ ۇرپاقتىڭ بىلىمىمەن تىعىز بايلانىستى. بۇل - وتە ماڭىزدى ميسسيا. ءوزىڭىز اتاعانداي، ءبىزدىڭ كوپ جىلدار بويعى تابىستى سەرىكتەستىگىمىز جالعاسىپ كەلەدى. ودان ءارى ىنتىماقتاستىققا دايىنبىز، ونىڭ ىشىندە، قازاقستانداعى مۇعالىمدەردىڭ بىلىكتىلىگىن ارتتىرۋ باعدارلامالارى بويىنشا"، - دەپ اتاپ ءوتتى اقش-تىڭ قازاقستانداعى توتەنشە جانە وكىلەتتى ەلشىسى دەنيەل روزەنبليۋم.
كەزدەسۋدە ءبىلىم سالاسىنداعى ىنتىماقتاستىقتىڭ باسقا دا ماسەلەلەرى تالقىلاندى. اتاپ ايتقاندا، مۇعالىمدەردىڭ بىلىكتىلىگىن ارتتىرۋ، كوللەدجدەردى دامىتۋ، ينكليۋزيۆتى ءبىلىم بەرۋ.
سونىمەن بىرگە تاراپتار ەكى ەلدىڭ مەكتەپكە دەيىنگى، ورتا، تەحنيكالىق جانە كاسىپتىك ءبىلىم بەرۋ سالاسىنداعى ارىپتەستىگىن ودان ءارى نىعايتۋعا جانە كەڭەيتۋگە قىزىعۋشىلىق ءبىلدىردى.