بيىل اكەلەر وداعىنىڭ قۇرىلعانىنا 10 جىل تولادى
ەلوردادا «وتباسى – ۇلت تىرەگى!» اتتى VII رەسپۋبليكالىق اكەلەر فورۋمى ءوتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
جيىندا «اكەلەر وداعى» رقب ءتوراعاسى ماقسۇتبەك ايتماعانبەت اكەلەر بىرلەستىگىنىڭ قۇرىلۋ تاريحىنا توقتالىپ، فورۋمنىڭ ماڭىزدىلىعىن اتاپ ءوتتى.
اكەلەر فورۋمىندا ۇلتتىق قۇندىلىقتار، پاتريوتيزم، ينكليۋزيا، وتباسىلىق ءبىلىم، ومىرلىك داعدىلار، مەكتەپتەردەگى اكەلەر كەڭەسى جانە بۇقارالىق سپورت تاقىرىپتارىندا 7 سەسسيا ءوتتى.
«بيىل اكەلەر وداعىنىڭ قۇرىلعانىنا 10 جىل تولادى. وسى جىلدار ىشىندە قوزعالىس ەلىمىزدىڭ بارلىق وڭىرلەرىن قامتىدى. جاۋاپتى، سانالى جانە ءپوزيتيۆتى اتا-انا بولۋعا باعىتتالعان 1000-نان استام جوبا ىسكە اسىرىلدى»، - دەدى م.ايتماعامبەت فورۋمنىڭ اشىلۋىندا.
پەداگوگ-كوۋچ عالىمبەك بەرماعامبەتوۆتىڭ ايتۋىنشا، اكەلەر فورۋمىنىڭ ناقتى ناتيجەسى – كوپ مەكتەپتەردە اكەلەر كەڭەسىنىڭ قۇرىلۋى بولدى.
«كوپ جاعدايدا مەكتەپتە اتا-انالار جينالىسى دەسە، وعان انالار عانا باراتىن. ال ءقازىر اكەلەر كەڭەسى ءجيى وتەدى، جىلدىق جوسپار جاسالىپ، اكەسى جوق بالالارعا اكە ورنىن تولتىرۋ ماسەلەلەرى تالقىلانادى. تاعى ءبىر وزەكتى ماسەلە – قازىرگى اكەلەر كوبىنە بانكوماتقا ۇقساپ بارادى، تەك ماتەريالدىق قاجەتتىلىككە عانا ءمان بەرۋ كوبەيدى. بالا تاربيەسىن دە بيزنەس تىلىمەن ايتساق، ءوز جۇبايىنا، تاربيەشىگە «اۋتسورسقا» جىبەردى. انا قانشا جەردەن مىقتى بولسا دا، اكەنىڭ ورنىن تولتىرا المايتىنىن، اكە دە انانىڭ ورنىن، ءمۇعالىم دە اتا-انانىڭ ورنىن باسا المايتىنىن جاقسى بىلەمىز. اكەلەر وداعى وسى ماسەلەنى حالىققا جەتكىزىپ، وي سالۋعا تىرىسىپ ءجۇر»، - دەدى ع. بەرماعامبەتوۆ.
پەداگوگ بالا تاربيەسى جار تاڭداۋدان باستالاتىنىن ەسكە سالدى.
«ادام نە ءۇشىن ۇيلەنىپ جاتقانىن، ءارى قاراي وتباسى قانداي باعىتتا ءوربيتىنىن سانالى تۇردە ءتۇسىنىپ ۇيلەنۋى كەرەك. «بالانى ەمەس، ءوزىڭدى تاربيەلە» دەگەن تۇجىرىم كوپتەگەن ۇلتتىڭ فيلوسوفياسىندا كەزدەسەدى. «بالا – اتا-انانىڭ ورىندالماي قالعان ارمانى» دەگەن دە ءسوز بار. ياعني، ءبىر اكە شىلىم شەگۋدى قويا الماسا، ءوز جىگەرىن جەڭە الماسا، بالاسىنىڭ شىلىم شەكپەگەنىن قالاپ، تىيىم سالا باستايدى. دەمەك، بالاعا ۇلگى رەتىندە بولۋى كەرەك. كوپ اكەلەر بالاسىنا ۇلگى بولۋ سىندى العا ۇلكەن مىندەت قويماعاندىقتان، قوعامدا زورلىق-زومبىلىق، اجىراسۋ جيىلەدى»، - دەيدى ع. بەرماعامبەتوۆ.