قازاقستاندىق 11-سىنىپ وقۋشىسى الەمنىڭ 34 ۋنيۆەرسيتەتىنەن شاقىرتۋ الدى.
ولاردىڭ قاتارىندا امەريكا، ۇلىبريتانيا، كانادا مەن يسپانيا، اۋستراليا ەلىندەگى جەتەكشى جوعارى وقۋ ورىندارى بار، دەپ حابارلايدى Almaty-akshamy.kz Qazaqtv.com سايتىنا سىلتەمە جاساپ.
ءبىرى تەگىن ءبىلىم الۋىنا جاعداي جاساسا، ەندى ءبىرى ءتۇرلى جەڭىلدىكتەر ۇسىنىپتى. ميراس سەيىلحاننىڭ بولاشاق ماماندىعى قارجى جانە ەكونوميكا سالاسىمەن بايلانىستى. ماقساتىنا جەتۋ ءۇشىن دارىندى وقۋشى 7-سىنىپتان باستاپ ءوزىن جان-جاقتى دامىتۋعا كوڭىل ءبولىپتى. حالىقارالىق سىناقتارعا ارنايى دايىندالعان. «ءار قادامىمدى باقىلاپ وتىرعان مۇعالىمدەرىم، مەكتەپتى ءبىتىرىپ كەتكەن اعالار كومەك بەردى»، – دەيدى ءبىلىمدار جاس.
"ەڭ باستىسى، ول «تايم مەنەدجمەنت». ياعني الدىن-الا دايىندالۋ. سونىمەن قاتار الدىن الا قاي جەردە وقىعىڭ كەلەتىنىن شەشۋ. سونىمەن قاتار جاقسى ورتانىڭ تابىلۋى. وسى ليسەي قابىرعاسىندا وتە ۇلكەن جەتىستىككە جەتكەن اعالارىمىز بار. الەمدىك دەڭگەيدەگى ۋنيۆەرسيتەتتەردە ءبىلىم الاتىن. سولاردىڭ دا قىزىقتى وقيعالارى ماعان موتيۆاسيا بەردى"، - دەيدى وقۋشى ميراس سەيىلحان.
ميراس سەيىلحان، سونداي-اق ءتۇرلى الەۋمەتتىك جوبالارعا باستاماشى بولىپ، ۆولونتەرلىك كلۋب قۇردى. العىرلىعىنىڭ ارقاسىندا ءوزى وقيتىن مەكتەپتىڭ پرەزيدەنتى اتاندى. وقۋىن ءتامامداعان سوڭ ەلگە ورالىپ، العان ءبىلىمىن ەلدى كوركەيتۋگە جۇمساعىسى كەلەدى. دارىندى وقۋشىنىڭ ەندىگى ارمانى – قازاقستاندى جاڭا دەڭگەيگە كوتەرۋ.