ەلىمىزدەگى كۇرىش القابىنىڭ اۋماعى ازايدى

سۋدى كوپ قاجەت ەتەتىن ءداندى داقىلدىڭ ورنىنا ماقتانى كوبىرەك ەكپەك.

ق ر اۋىل شارۋاشىلىعى ءمينيسترى ەربول قاراشوكەيەۆتىڭ ايتۋىنشا، قازاقستان 2022 جىلى سۋارمالى جەرلەردەگى ەگىس كولەمىن 39 مىڭ گەكتارعا قىسقارتادى، دەپ حابارلايدى Almaty-akshamy.kz

مينيستر ۇسىنعان دەرەك بويىنشا، جوسپارلانعان ەگىستىك كولەمى 1 ميلليون 488 مىڭ گەكتاردى قۇرايدى. بۇل وتكەن جىلمەن سالىستىرعاندا 39 مىڭ گەكتارعا (2،6%) از. سونداي-اق القاپتىڭ اقىرعى اۋماعى ەگىس جۇمىستارى اياقتالعان سوڭ ناقتىلانادى.

«سۋدى كوپ قاجەت ەتەتىن اۋىل شارۋاشىلىعى داقىلدارىن ءارتاراپتاندىرۋ جالعاسىپ جاتىر. وسىعان بايلانىستى 2021 جىلمەن سالىستىرعاندا كۇرىش ەگىستىگىنىڭ كولەمى 8،7 مىڭ گەكتارعا قىسقارادى دەپ كۇتىلۋدە. ونىڭ ىشىندە قىزىلوردا وبلىسىندا 5،3 مىڭ گەكتارعا، تۇركىستان وبلىسىندا 2،9 مىڭ گەكتارعا جانە الماتى وبلىسىندا 0،6 مىڭ گەكتارعا ازايادى»، - دەدى اۋىل شارۋاشىلىعى ءمينيسترى.

قاراشوكەيەۆ ەلىمىزدە ماقتا القابىنىڭ اۋماعى 119 مىڭ گەكتارعا ۇلعايتىلعانىن، بۇل وتكەن جىلمەن سالىستىرعاندا 9 مىڭ گەكتارعا ارتىق ەكەنىن اتاپ ءوتتى. بۇعان جوعارى ساتىپ الۋ باعاسى ىقپال ەتكەن: شيكىزات ماقتانىڭ ءبىر تونناسى 350 مىڭ تەڭگەدەن ساتىلىپ، بۇل 2020 جىلمەن سالىستىرعاندا 220 مىڭ تەڭگەگە جوعارى بولعان.

اۋىل شارۋاشىلىعى مينيسترلىگىنىڭ مالىمەتىنشە، ءقازىر وڭتۇستىك وڭىردە سۋارمالى القاپتاردا ەگىس جۇمىستارى اياقتالىپ جاتىر (جامبىل وبلىسىندا 100% اياقتالدى)، ال باسقا ايماقتاردا جۇمىستار ءالى دە جۇرگىزىلۋدە.