الماتىلىق جاس كاسىپكەر باستاعان توپ ءموبيلدى قوسىمشا ويلاپ تاپتى.
وعان اقش تاراپى قىزىعۋشىلىق ءبىلدىرىپ وتىر. ونلاين الاڭ كولىك يەلەرى مەن بىرگە اۆتوشەبەرلەر ءۇشىن ازىرلەنگەن، دەپ حابارلايدى Almaty-akshamy.kz
جوبا جولداعى كەز كەلگەن كۇتپەگەن جاعدايدى جەدەل شەشۋگە باعىتتالعان. ماسەلەن، ەلەكتروندى تۇعىرناما ارقىلى تەمىر تۇلپار دوڭگەلەگىن اۋىستىرۋ سىندى ءتۇرلى كولىك اقاۋلارىن قالپىنا كەلتىرۋ ءۇشىن ەۆاكۋاتوردى نەمەسە ەلەكترومەحانيكتى شاقىرۋعا بولادى.
«ءقازىر ءبىز جوسپارلاعان ماقساتتارعا جەتۋ ءۇشىن جۇمىس جاساپ جاتىرمىز. جوبانى شىلدە ايىنىڭ سوڭىنا دەيىن ىسكە قوسىپ، بيزنەستى باستاپ كەتۋ كەرەك. ءقازىر سوڭعى پىسىقتاۋلار ءجۇرىپ جاتىر. جوبامىزدى الدىمەن كاليفورنيا مەن تەحاستا ەندىرىپ، كەيىن لوس-اندجەلەس نارىعىن باعىندىرۋ كوزدەلگەن»، - دەيدى ءموبيلدى قوسىمشا اۆتورى باعلان ولجابايەۆ.
كوماندا قوسىمشانى ءۇش جىل بويى 2017 دەن 2020 جىلعا دەيىن ازىرلەدى. بولاشاقتا ونى ءبىرقاتار جاڭا فۋنكسيامەن تولىقتىرۋ كوزدەلۋدە. جاقىن ۋاقىتتا ونلاين كەڭەس بەرۋ قىزمەتى قوسىلماق. ياعني، جۇرگىزۋشى كەنەتتەن سىر بەرگەن تەمىر تۇلپارىن ارنايى تەحستانسيالارعا سۇيرەمەي-اق، شەبەرلەردىڭ قاشىقتان بەرگەن نۇسقاۋلىقتارىنا سۇيەنىپ وزدىگىنەن جوندەي الاتىن بولادى.
«ۇيالى قوسىمشاعا كىرىپ، باس پاراقشانىڭ ۇستىڭگى جاعىنداعى ستوريستەرگە باساسىز. ول جەردە كولىكتى جوندەۋ اقىسىن باعالاۋ فۋنكسياسى قاراستىرىلعان، 30 سەكۋندتىق ۆيدەوعا نەمەسە فوتوعا تۇسىرۋگە مۇمكىندىك بار. ءتۇسىرىپ، شەبەرگە جىبەرەسىز. ولار قاراپ، باعالاپ، قانشا ۋاقىت قاجەت ەكەنىن ايتادى. ال تومەنگى جاعىندا شەبەردى شاقىرۋ فۋنكسياسى بار. قاي جەردە جۇرسەڭىز دە، ول كومەككە كەلەدى. سونداي-اق، قاراپايىم پايدالانۋشىنىڭ تابىس تابۋ مۇمكىندىگى قاراستىرىلعان. مىسالى، مەن اۆتوكونسەرج نەمەسە بەنزين جەتكىزۋ قىزمەتىن كورسەتە الامىن. كولىگىم بولسا، كۋرەر بولۋعا بولادى. ەۆاكۋاتور كولىگىم بولسا، سايكەس قىزمەتتەر كورسەتۋگە بولادى»، - دەيدى ءموبيلدى قوسىمشا اۆتورى باعلان ولجابايەۆ.
ايتا كەتەيىك، بۇگىندە 6 مىڭ اۆتوكولىك يەسى جانە 800 ءجۇز شەبەر ءموبيلدى قوسىمشانى بەلسەندى پايدالانىپ ءجۇر.