بەلگيادا وتكەن بۇكىلالەمدىك فولكلورلىق بي فەستيۆالىندە 11 ەلدىڭ بيشىلەرىمەن بىرگە «نوماد» حورەوگرافيا اكادەمياسىنىڭ ستۋدەنتتەرى دە ونەر كورسەتتى.
8 بەن 18 جاس ارالىعىنداعى تالانتتار كوپتىڭ نازارىنا «قازاق دالاسىنىڭ اڭىزى» سپەكتاكلىن ۇسىندى، دەپ حابارلايدى Almaty-akshamy.kz Qazaqstan.tv-عا سىلتەمە جاساپ.
ماحاببات پەن مەيىرىمگە تولى قويىلىمدا قازاق قىزدارىنىڭ باتىرلىعى، حالقىمىزدىڭ سالت—ءداستۇرى مەن قوناقجايلىلىعى كەڭىنەن كورسەتىلەدى. سىرعا تولى ۇلتتىق اسپاپتاردىڭ قوڭىر ءۇنى، كوزدىڭ جاۋىن الاتىن ۇلتتىق كيىمدەر بەلگيالىقتاردى ءتانتى ەتتى. تالانتىمەن تامسانتقان شەبەرلەردىڭ ونەرىنە كوپشىلىك قوشامەتتى جاۋدىردى.
«بۇل وزگەدەن ەرەك سپەكتاكل. حورەوگرافياسى سيقىرلى. حورەوگراف ايناگۇل حانىمنىڭ بالالارمەن كەرەمەت جۇمىس ىستەگەنى كورىنىپ تۇر. جاس تالانتتاردىڭ ساحناداعى ءار قيمىلى ەرەكشە اسەر بەردى»، - دەيدى فەستيۆال ديرەكتورى دانيەل كۋستري.