حالىقارالىق جارىستاردا ەلىمىزدىڭ مەرەيىن ۇستەم ەتىپ، توپ جارىپ جۇرگەن سپورتشىلار قاتارى كۇن ساناپ ارتىپ كەلەدى.
سولاردىڭ قاتارىنا جاقىندا اسىق اتۋ سپورتىنان رۋمىنيا ەلىندە وتكەن الەم كۋبوگىنىڭ جەڭىمپازى الماس قارابايەۆ تا ەنىپ وتىر. ول – تۇركىستان وبلىسى تۇلكىباس اۋدانىنىڭ تۇرعىنى، دەپ حابارلايدى Almaty-akshamy.kz Baq.kz-كە سىلتەمە جاساپ.
تۇلكىباس اۋدانىنىڭ اكىمى نۇرلان بايعۇت حالىقارالىق ارەنادا ەلىمىزدىڭ ابىرويىن اسقاقتاتىپ كەلگەن جەڭىمپازدى شاكىرتتەرىمەن بىرگە قابىلداپ، قۇرمەت كورسەتتى. اۋدان باسشىسى اتالعان جەڭىس اۋداننىڭ عانا ەمەس، ەلىمىزدىڭ جەڭىسى ەكەنىن تىلگە تيەك ەتىپ، الماس وڭلاسىن ۇلى مەن شاكىرتتەرىنە الداعى بايراقتى باسەكەلەردە ساتتىلىك تىلەدى.
اۋدانداعى ا.س.پۋشكين اتىنداعى مەكتەپ-ليسەيىندە دەنەشىنىقتىرۋ ءپانىنىڭ ءمۇعالىمى قىزمەتىن قاتار الىپ جۇرگەن الماس قارابايەۆ اسىق اتۋ سپورتىنىڭ ۇلتتىق قۇراما كومانداسىنىڭ كاپيتانى رەتىندە كوپتەگەن جارىستا توپ جارعان. ق ر كۋبوگى مەن چەمپيوناتىنىڭ بىرنەشە دۇركىن جەڭىمپازى ءارى جۇلدەگەرى.
بۇگىندە الماس باپكەر رەتىندە دە ءوزىن دالەلدەپ ءجۇر. ونىڭ شاكىرتتەرى اسىق جانە بەس اسىق اتۋ سپورت تۇرلەرىنەن ق ر چەمپيوناتىنىڭ جانە ۇلتتىق ويىندارىنىڭ چەمپيوندارى اتانىپ، سەنىمىن اقتاپ كەلەدى.