التى قىلمىستىق ءىس قوزعاۋعا نەگىز بار.
الماتىدا سپورتتىق جانە شىعارماشىلىق تاپسىرىستى جۇزەگە اسىرۋ بويىنشا قوعامدىق جۇمىس توبىنىڭ كەزەكتى وتىرىسى ءوتتى، دەپ حابارلايدى Almaty-akshamy.kz.
باس پروكۋراتۋرانىڭ تاپسىرماسى بويىنشا الماتى قالاسىنىڭ پروكۋراتۋراسى Artsport باعدارلاماسىن تەكسەرىپ جاتىر. سونىڭ ناتيجەسىندە ايتارلىقتاي زاڭ بۇزۋشىلىقتار انىقتالعان. الماتى قالاسى پروكۋرورىنىڭ ءبىرىنشى ورىنباسارى نۇرسۇلتان راقىشيەۆتىڭ ايتۋىنشا، التى قىلمىستىق ءىس قوزعاۋعا نەگىز بار.
«بىرەۋىنىڭ ماتەريالدارى الىنىپ، قىلمىستىق ءىس قوزعالدى، قالعانىنا اۋديت، ءتيىستى ساراپتامالار تاعايىندادىق، بىرنەشە ميلليون بيۋدجەت قاراجاتىن جىمقىرۋ انىقتالدى. مۇندا بيۋدجەت قارجىسىن ۇرلاۋ ءۇشىن ناقتى سحەما قولدانىلعانىن كورىپ وتىرمىز. ءبىز وسى باعدارلامانىڭ جۇمىسىن قولدانىستاعى زاڭناماعا سايكەس رەتتەۋىمىز كەرەك. باعدارلاما فۋنكسيونالىنىڭ ءوزى ءتيىمسىز، باقىلاۋ-قاداعالاۋ ورگاندارىنا بيۋدجەت قارجىسىنىڭ جۇمسالۋىن ۋاقىتىلى ءارى ءتيىمدى باقىلاۋعا مۇمكىندىك بەرمەيتىنىن كورىپ وتىرمىز. سول سەبەپتى بۇگىنگى كۇنى پروكۋرورلىق قاداعالاۋ اكتىلەرىن ەنگىزدىك، وندا وسى بۇزۋشىلىقتاردىڭ بارلىعىن كورسەتتىك. سونىمەن قاتار، وتكەن جولى بۇرىن سوتتالعان 10-نان استام جاتتىقتىرۋشىنىڭ بالالارمەن جۇمىس ىستەگەن فاكتىلەرىنىڭ بار ەكەنىن ايتتىق. تەكسەرۋ جالعاسۋدا»،- دەدى نۇرسۇلتان راقىشيەۆ.
پروكۋروردىڭ سوزىنە جۇگىنسەك، 3000-نان استام بالا شەتەلدە بولسا دا، قاعاز جۇزىندە ۇيىرمەگە تىركەلگەن، 5000-نان استام ساباق وتكىزىلمەگەن.
«بۇل رەتتە، ەڭبەك شارتتارىن جاساسپاعان، زەينەتاقى اۋدارىمدارى جۇرگىزىلمەگەن جاتتىقتىرۋشىلاردىڭ وزدەرىنە قاتىستى دا ەڭبەك قۇقىقتارىنىڭ بۇزىلۋىنا جول بەرىلدى. بىرنەشە ميلليون دوللارلىق زالال كەلتىرىلدى، تەكسەرۋ ءالى جالعاسىپ جاتىر. بۇعان قوسا، جۇيەنىڭ جۇمىسىنا قاتىستى ماسەلەلەر بار. ءقازىر ءبىز تەكسەرۋ كوميسسياسىمەن بىرلەسىپ، باقىلاۋ-قاداعالاۋ ورگاندارىنا جوق جسن، باسقا وبلىستاردا تۇراتىن بالالار جانە ت.ب. س.س الاياقتىقتىڭ جولىن كەسۋ ءۇشىن باعدارلامانىڭ وزىنە تەحنيكالىق اۋديت جۇرگىزۋدى پىسىقتاپ جاتىرمىز. جاقىندا سوڭعى ناتيجەلەرى شىعادى»،- دەدى پروكۋرور.