بيىلعى وقۋ جىلىنىڭ باسىنان باستاپ ەلىمىزدىڭ توعىز وڭىرىندە وقۋشىلار ءۇشىن ءقاۋىپسىز جانە قولايلى ورتا قۇرۋعا باعىتتالعان «دوسبولLIKE» بۋللينگكە قارسى باعدارلاماسىن اپروباسيالاۋ جۇرگىزىلۋدە.
اتالعان باعدارلامامەن 70 مىڭعا جۋىق وقۋشى، 5 مىڭنان استام پەداگوگ جانە ءبىلىم بەرۋ ۇيىمدارىنىڭ قىزمەتكەرلەرى قامتىلدى. سونداي-اق بارلىق مۇعالىمدەر مەن مەكتەپ اكىمشىلىگى ءۇشىن باعدارلامانى ءساتتى ەنگىزۋ ماقساتىندا نۇسقاۋلىق-ادىستەمەلىك سەمينارلار ۇيىمداستىرىلدى.
جوباعا قاتىسۋشىلارعا ارنالعان بالالار اراسىنداعى قاقتىعىستاردىڭ الدىن الۋ جانە سەبەپتەرىن انىقتاۋ بويىنشا ترەنينگتەر مەن پراكتيكالىق ءىس-شارالار ءوتتى. ال اتا-انالارعا «دوسبولLIKE» باعدارلاماسىنىڭ ماقساتتارى مەن ادىستەرىن تۇسىندىرەتىن ارنايى ءىس-شارالار قاراستىرىلعان.
«دوسبولLIKE» باعدارلاماسى مەكتەپتەردە ءار بالا ءوزىن ءقاۋىپسىز سەزىنەتىن قولايلى ورتا قۇرۋعا باعىتتالعان باعدارلاما. ول وقۋشىلار اراسىندا ءوزارا سىيلاستىق پەن بىر-بىرىنە جاردەمدەسۋ مادەنيەتىن قالىپتاستىرۋعا ىقپال ەتەدى. پيلوتتىق جوبانىڭ جەتىستىكتەرى ونىڭ بۇكىل ەل بويىنشا تاراتىلۋىنا نەگىز بولادى دەپ كۇتىلۋدە»، — دەپ اتاپ ءوتتى ق ر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ ءتورايىمى ناسىمجان وسپانوۆا.
باعدارلاما مۇعالىمدەرگە ادىستەمەلىك قولداۋ كورسەتۋدى قامتيدى، بۇل مەكتەپتە دوستىق احۋال قالىپتاستىرۋعا، جالپى كليماتتى جاقسارتۋعا جانە بۋللينگ دەڭگەيىن تومەندەتۋگە ىقپال ەتەدى. سونىمەن قاتار، ق ر وقۋ-اعارتۋ مينيسترلىگىنە قاراستى «وركەن» بالالاردىڭ ءال-اۋحاتىن ارتتىرۋ ۇلتتىق عىلىمي-پراكتيكالىق ينستيتۋتى جاقىندا «دوسبولLIKE» باعدارلاماسىنىڭ ۆيزۋالدى ءستيلىن جاساۋ بويىنشا بايقاۋ وتكىزدى. وعان ءتۇرلى نوميناسيالار بويىنشا 80 جوبا ۇسىنىلدى. ۇزدىك جوبا اۆتورلارى جۇلدەلى ورىنداردى يەلەندى.
پيلوتتىق باعدارلاما 50 مەكتەپتە جۇزەگە اسىرىلۋدا، ولاردىڭ اراسىندا اباي، جەتىسۋ، ۇلىتاۋ، اتىراۋ، الماتى، جامبىل، تۇركىستان وبلىستارى مەن استانا جانە الماتى قالالارى بار. باعدارلامانىڭ تيىمدىلىگىن باعالاۋ جانە ونى قازاقستاننىڭ ءبىلىم بەرۋ ۇيىمدارىندا ودان ءارى تاراتۋعا دايىندالۋ ماقساتىندا اپروباسيا وقۋ جىلىنىڭ سوڭىنا دەيىن جالعاسادى.