دارىگەرلەر اۋرۋدىڭ الدىن الۋعا كەڭەس بەردى.
بۇگىن الەم بويىنشا دۇنيەجۇزىلىك قانت ديابەتىمەن كۇرەس كۇنى اتاپ وتىلەدى، دەپ حابارلايدى aqshamnews.kz
اتاۋلى كۇن بۇۇ-نىڭ حالىقارالىق كۇنتىزبەسىندە رەسمي تۇردە بەكىتىلگەن. بيىل بۇل كۇن «كەدەرگىلەردى جەڭۋ، ولقىلىقتاردى جويۋ» تاقىرىبىندا اتاپ وتىلەدى، باسقاشا ايتقاندا قانت ديابەتىمەن اۋىراتىن ادامداردى ەمدەۋگە جانە قولداۋعا تەڭدەي قول جەتكىزۋ قاجەتتىلىگىنە نازار اۋدارىلادى.
«حالىقارالىق ديابەت فەدەراسياسىنىڭ (IDF) دەرەكتەرى بويىنشا، الەمدە قانت ديابەتىمەن اۋىراتىن 500 ميلليوننان استام ادام بار. قازاقستاندا بيىلعى 1 قازانعا قانت ديابەتى دياگنوزى قويىلعان 516 مىڭ 564 تۇرعىن تىركەلگەن، ونىڭ 92،4%-ى نەمەسە 486 853ء-ى 2 ءتيپتى قد-نىڭ ۇلەسىنە تيەسىلى، 1ء-تيپتى قانت ديابەتى دياگنوزى 29 711 قازاقستاندىقتان انىقتالدى»، – دەلىنگەن دەنساۋلىق ساقتاۋ مينيسترلىگىنىڭ حابارلاماسىندا.
مامانداردىڭ ايتۋىنشا، ديابەت جاي عانا اۋرۋ ەمەس. ول – مۇگەدەكتىككە، ءتىپتى ولىمگە اكەلۋى مۇمكىن ەلەۋلى ءقاۋىپ. سوقىرلىق، بۇيرەك جەتكىلىكسىزدىگى، جۇرەك-قان تامىرلارى اۋرۋلارى، اياقتىڭ امپۋتاسياسى سياقتى ءبىرقاتار اۋىر اسقىنۋدى تۋدىرۋى ىقتيمال.
بۇرىن بۇل اۋرۋ ەرەسەكتەرگە ءتان بولسا، ءقازىر ءومىر سالتىنا بايلانىستى بالالار مەن جاسوسپىرىمدەردىڭ اراسىندا دا ءجيى كەزدەسەتىن بولدى.
اقپاراتقا سايكەس، ۇلتتىق سكرينينگتىك باعدارلاما اياسىندا قازاقستاندا جىل سايىن شامامەن 1،6 ملن ادام قانت ديابەتىن ەرتە انىقتاۋ ءۇشىن تەكسەرۋدەن وتەدى، ونىڭ ىشىندە 10%-ىندا گيپەرگليكەميا بەلگىلەرى انىقتالادى.
«قازاقستاندا قانت ديابەتى دياگنوزى قويىلعان بارلىق پاسيەنتتەر تەگىن ەم قابىلداپ، كونسۋلتاسيالىق-دياگنوستيكالىق قىزمەتتەر الادى ءارى دارىگەرلەردىڭ تۇراقتى باقىلاۋىندا بولادى. ولار، سونداي-اق، 46 ءتۇرلى دارىلىك پرەپاراتتارمەن تولىق كولەمدە قامتاماسىز ەتىلگەن، ونىڭ ىشىندە بۇل ءينسۋليننىڭ 20 ءتۇرى جانە مەديسينالىق بۇيىمداردىڭ 14 ءتۇرى»، – دەلىنگەن مينيسترلىك حابارلاماسىندا.
سونىمەن بىرگە، كورسەتىلىمدەر بولعان جاعدايدا پاسيەنتتەر قاجەتتى ستاسيونارلىق كومەك الادى. وتكەن جىلى قانت ديابەتىمەن اۋىراتىن 56 مىڭ 933 پاسيەنت سوندا ەمدەلگەن.
دارىگەرلەر قانت ديابەتىنىڭ اۋىر زارداپتارىن بولدىرماۋدىڭ ەڭ جاقسى جولى الدىن الۋ ەكەنىنە نازار اۋداردى. 2ء-تيپتى قانت ديابەتى مەن ونىڭ اسقىنۋلارىنىڭ الدىن الۋ ءۇشىن كەلەسى نۇسقاۋلاردى ورىنداعان ءجون:
قالىپتى دەنە سالماعىن ساقتاۋ؛
كۇن سايىن كەم دەگەندە 30 مينۋت فيزيكالىق بەلسەندىلىكپەن اينالىسۋ؛
دۇرىس تاماقتانۋ؛
قانت پەن قانىققان مايدى تۇتىنۋدى ازايتۋ؛
تەمەكى شەگۋدەن تولىعىمەن باس تارتۋ.